“Якутия24” телеханаал быһа биэриитигэр Арктика форумун сүрүн түгэннэрин көрүҥ

Муус устар 9 уонна 10 күннэригэр “Якутия24” телеханаал Санкт-Петербурга ыытыллар Норуоттар икки ардыларынааҕы  Арктика V форумун сүрүн түгэннэрин быһа эфиргэ көрдөрүөҕэ.

Муус устар 9 күнүгэр олохтоох бириэмэнэн 15.00  чаастан телеханаал эфиригэр Арассыыйа Арктикаҕа сыһыаннаан ыытар бэлиитикэтин, Арктиканы баһылааһыҥҥа Саха сирин оруолун, Санкт-Петербуртан телеханаал кэрэспэдьиэннэрин быһа холбооһун, ону тэҥэ Форум былаһааккаларыттан быһа биэриилэр көстүөхтэрэ. Бу биэриилэргэ Арассыыйа бэрэсидьиэнэ Владимир Путин, тас дойдулар дьыалаларын миниистирэ Сергей Лавров, Саха сирин баһылыга Айсен Николаев, Саха сирин дэлэгээссийэтэ кыттыахтара.

Муус устар 8 күнүгэр бастакы көрсүһүүлэр, мөккүөрдэр-ырытыһыылар уонна сессиялар форум былаһааккатыгар ыытыллыбыттара. Спикердэр Арктикаҕа энергетиканы солбуйар кыахтар, ньиэп-гаас баайдаах сирдэри баһылааһын кэскиллэрин уонна кыһалҕаларын, ыччат урбаанынан дьарыктаныытын өйөөһүн тустарынан дьүүллэстилэр.

“Арктика- ыллыктаах кэпсэтии сирэ” Норуоттар икки ардыларынааҕы  Арктика V форума Санкт Петербурга муус устар 9-10 күннэригэр ыытыллар. Быйыл сүрүн тиэмэ – “Арктика. Муҥутуур кыахтар”. Форум дьыалабыай чааһыгар Арассыыйа 300 уонна 11 тас дойдуттан 46 омук хампаанньата  кытталлар.

Быһа биэриини онлайн режиминэн ссылкаҕа киирэн көрүөххэ сөп.