“Якутия24” ханаалыгар саҥа биэрии таҕыста. Манна Саха сирин олохтоохторо коронавирустан сылтаан олохтоммут хааччахтааһыннар тустарынан санааларын үллэһиннилэр.
“Якутия24” теле-ханаал Саха сирин саамай дьоһун суолталаах сонуннарын туһунан “Кырдьыктаах кэпсэтии” бырагырааманы саҕалаата. Бастакы таһаарыыга коронавирустан сылтаан киирбит хааччахтааһыннар тустарынан тиэмэҕэ кэпсэттилэр. Бу боппуруоска араас көрүүлэрин кэпсэтээччилэр тириэртилэр.
Арассыыйаҕа уонна өрөспүүбүлүкэҕэ ыйтан ордук кэм устата дьиэттэн тахсыбакка олоруу эрэсиимэ олохтоммута, онон бачча кэм устата үгүс тэрилтэлэр уонна урбаанньыттар үлэлээбэккэ олороллор, хаайтаран олоруу уустуктары үөскэтэр. ВЦИОМ чахчытынан, ыйытыллыбыт дьонтон 60 бырыһыаннара хааччахтыыр миэрэлэри ылыналларын этэллэр. Оттон сорохтор хааччахтааһыннары аһары барыы курдук көрөн, тохтоторго көрдөһөллөр. Өрөспүүбүлүкэ күнүгэр хааччахтаааһыны толорботох хас да киһи тутуллубута.
Биэрии кыттыылаахтара ыытааччылар Ирина Ефимованы уонна Влад Давыдовы кытта видео-сибээс көмөтүнэн кэпсэттилэр.
Бастаан дьиэҕэ бүгэн олоруу дьон туругар хайдах сабыдыаллыырын туһунан Дьиэ кэргэни уонна ыччаты социальнай-психологическай өттүнэн өйүүр өрөспүүбүлүкэтээҕи киин дириэктэрэ Владимир Скрябин кэпсээтэ. Кини дьон куттанар уонна долгуйар буолбутун бэлиэтээтэ, ол эрээри дьон чугас дьонун кытары бириэмэни бииргэ атааралларыгар кыах үөскээбитин бэлиэтээтэ.
Кэрэ буолуу солуоннаах блогер Варвара Максимова (Варя Максима) бу салаа үлэһиттэрэ ыам ыйын 12 күнүттэн хааччахтааһыннары устуохтара диэн эрэнэллэрин тириэртэ: “Хааччахтанан олоруу сөптөөх диэн өйдүүбүн, ол эрээри бу өҥөҕө наадыйыы намтаабат, дьон маастардарга дьиэлэригэр сылдьаллара кутталлаах, солуоннарга сөптөөх усулуобуйаны тэрийэрдээҕэр. Дохуот суох, оттон дьон кирэдьиит төлүөхтэрин наада”.
Дьаҥы бохсууга көдьүүстээх миэрэнэн дьиэттэн тахсыбакка олоруу буоларыгар Социальнай чинчийиилэр эспиэрдиир институттарын эрэгийиэн бырагыраамаларыгар департаменын салайааччыта Дарья Кислицына эрэнэр. Кини эрэгийиэннэр бу дьаҥы утары үлэлэрин кэтээн көрөр.
“Онон тулуурдаах буолуохха, атын дойдуларга тэҥнээтэххэ, дьиэҕэ кылгас кэмҥэ олордубут. Таһырдьа сылыйар, маай бырааһынньыктара үүннүлэр, оттон барытын дьаалатынан ыыттахпытына, дьаҥҥа сыстыы ахсаанын элбэтиэхпит”, — диэтэ Дарья.
Ток-шоу ыам ыйын 2 күнүгэр тахсыбыта. Манна көрүҥ:
Бэлэмнээтэ Женни СТРЮКОВА,
“Саха сирэ” хаһыат, edersaas.ru