Саха сиригэр күһүн халлаан туруга уларыйар кэмигэр, авиа-хампаанньалар сөмөлүөттэрин уонна үлэлиир эбийиэктэрин туругун, үлэһиттэрин бэлэмнэрин, куттал суох буолуутун ирдэбилин толорууну бэрэбиэркэлээһини күүһүрдэллэр.
“Якутия” авиа-хампаанньа генеральнай дириэктэрин солбуйааччы Илья Пономарев иһитиннэрбитинэн, хампаанньа күһүҥҥү уонна кыһыҥҥы рейстэри оҥорорга толору бэлэм.
“Атырдьах ыйын 17 күнүгэр, Росавиация Дьокуускайдааҕы эрэгийиэннэр икки ардыларынааҕы салалтата” “Якутия” авиа-хампаанньа эбийиэктэригэр бэрэбиэркэ ыыппыта. Бэрэбиэркэ түмүгүнэн, авиа-хампаанньа дьону таһыан сөп диэн быһаарыллыбыта”,
— диэн биллэрдэ.
Александр Зинков, “Якутия” авиа-хампаанньа тэхиньиичэскэй дириэктэрэ:
— Инженернэй-авиационнай сулууспаҕа сөмөлүөтү көтүүгэ бэлэмниир анал үлэлэр былааннара оҥоһуллубута. Маны таһынан, экипаж чилиэннэрин эбии үөрэтии, эбийиэктэри, саҥа тутуулары уонна тэриллэри үлэҕэ бэлэмнээһин ыытыллар.
Күһүн уонна кыһын көтүү бырагыраамата оҥоһуллубут. Балаҕан ыйын ортото кыһыҥҥы билиэттэр атыыга тахсаллара былааннанар. Холобур, Дьокуускай-Москва-Дьокуускай хайысханан сөмөлүөт күн ахсын иккитэ көтөрө былааннанар. Санкт-Петербурга Дьокуускайтан оптуорунньукка уонна бээтинсэҕэ көтүө. Маны таһынан, бэнидиэнньиккэ уонна бээтинсэҕэ Екатеринбурга, сэрэдэҕэ уонна субуотаҕа Владивостокка, оптуорунньук аайы Улан-Удэҕа, сэрэдэҕэ Благовещенскайга, Харбиҥҥа, Иркутскайга уонна чэппиэр аайы Читаҕа көтүөххэ сөп.
“Якутия” авиа-хампаанньа рейстэрэ:
- Дьокуускай-Хабаровскай-Южно-Сахалинскай-Нарита (Япония) нэдиэлэ иккис уонна бэһис күннэригэр,
- Дьокуускай-Новосибирскай-Нерюнгри хайысхаларынан нэдиэлэ үһүс уонна сэттис күннэригэр,
- Дьокуускай-Иркутскай-Ташкент субуота аайы,
- Дьокуускай-Сеул баскыһыанньа аайы,
- Москва-Нерюнгри сэрэдэҕэ уонна бээтинсэҕэ,
- Дьокуускай-Магадан-Анадырь сэрэдэ аайы.
Бу рейстэр 2018 сыл алтынньы 28 күнүттэн саҕалаан 2019 сыл кулун тутар 30 күнүгэр диэри оҥоһуллуохтара.
Николай Попов, «Саха сирэ» хаһыат, edersaas.ru