Бу күннэргэ «Якутия» урутаан сайдар сир (ТОР) саҥа резиденэ «Соляная лавка» хампаанньа Кэмпэндээйи тууһун оҥорон таһаарыыга Уһук Илини уонна Арктиканы сайыннарыы корпорациятын кытары сөбүлэһии түһэристэ.
Предприятие сылга 400 туонна тууһу оҥорон таһаарыаҕа. Бастаан утаа, бырайыагы олоххо киллэриигэ, «Якутия» ТОР производственнай эбийиэгэр үлэлиэхтэрэ. Манна резидент технологическай уонна суулуур-хаалыыр оборудованиены таҥан туруоруоҕа.
Тууһу өрүс суолунан Кэмпэндээйиттэн аҕалар былааннаахтар.
«Дьокуускайга Кэмпэндээйиттэн аҕалыллыбыт сырьены хатаран, үлтүрүтэн, тута туһанарга сөптөөх тууһу оҥоруохпут. Оттон бэлэм бородууксуйаны маҕаһыыннарынан тарҕатан атыыга таһаарыахпыт», – диэн «Соляная Лавка» генеральнай дириэктэрэ Туяра Игнатьева иһитиннэрдэ.
Санатан эттэххэ, Кэмпэндээйи тууһа алтынньы бүтүүтүттэн саҕалаан, муус устарга диэри сир анныттан өрө тэбэн тахсан биир сиргэ мунньуллар. Тахсыбыт туус бастаан убаҕас ууга маарыҥныыр, онтон сааһыары сытан эрэн кууран, үп- үрүҥ тууска кубулуйар. Бэс ыйыттан саҕалаан мунньуллубут тууһу кууллаан бараллар. Туус састааба тастан кэлэр туустан туох да атына суох.
edersaas.ru