«Якутия» технопаарка уонна «Якутия» венчурнай хампаанньа 10 сыллаах үбүлүөйдэрэ

«Якутия» технопаарка уонна «Якутия» венчурнай хампаанньа 10 сыллаах үбүлүөйдэрин бэлиэтииллэр.

Бүгүн сарсыарда 10 чааска «Арассыыйа — мин устуоруйам» историческай пааркаҕа РФ Наука уонна технология сылыгар анаммыт «Sakha Innovation Expo» инновационнай индустрия быыстапката үөрүүлээх быһыыга арылынна. Тэрээһин «Якутия» Технопаарка уонна «Якутии» Венчурнай хампаанньа тэриллибиттэрэ 10 сылыгар ананар.
Ол да иһин буолуо, кыттар тэрилтэ икки мэндиэмэн тухары бу икки кэскиллээх тэрилтэ 10 сыл устата ыыппыт үлэлэрин билиһиннэрэр киэҥ ис хоһоонноох быыстапканы тэрийбиттэр.

Ол курдук, манна «Якутия» технопаарканы кытта бииргэ үлэлэһэр «Саха Липснеле»; «Эгопласт»; «Теплый край»; «Информационнай-техническэй киин»; «МилаМакс Плюс»; «Саха Фильтр» ХЭУо-лар; резиденнэр: Заморщикова Н.Ю. («Сахачай») СПОК «Тирэх», «Дары Якутии», «Арктик Хемистри», «Бигэ» («Arctic color»), «Криопротект», «Хоту Тент», «Хоту-Бакт» НПЦ курдук номнуо биллэр ааттаах-суоллаах тэрилтэлэр бэйэлэрэ оҥорон таһаарар бородууксуйаларын, тэриллэрин, көлөлөрүн, оҥоһуктарын көрдөрүүгэ туруорбуттар.
Быыстапка аһыллыытыгар «СӨ инновацияҕа туйгуна» бочуоттаах бэлиэни үөрүүлээх быһыыга-майгыга туттарыы буолла. Биир бастакынан бу бэлиэнэн «Якутия» Технопаарка дириэктэрэ Петр Габышев наҕараадаланна. Маны таһынан, экономическай наука кандидата Александр Мярин, биологическай наука доктора Михаил Черосов, «Майтона» ХЭУо бырайыактарын менеджерэ Иннокентий Слепцов, СӨ наукаҕа уонна тиэхиньикэҕэ салаатыгар Государственнай бириэмийэ лауреата, ветеринарнай наука доктора Михаил Неустроев наҕараадаланнылар.

Быыстапкаҕа Уһук Илиҥҥитээҕи үрдүк технологиялар пуондаларын генеральнай дириэктэрэ Руслан Саркисов кыттыыны ылла. Бочуоттаах ыалдьыт: «Биһиги «Якутия» Технопаарка уонна венчурнай хампаанньа ыытар үлэлэрин хайа күн тэриллиэхтэриттэн билсэ олоробут. Туох чинчийии үлэтэ барарын, резиденнэр оҥорон таһаарбыт бородууксуйаларын хайдах ханна батаралларын, кэммиэрчэскэй соруктарын хайысхаларын кэтии, үөрэтэ сылдьабыт уонна кинилэртэн үгүс көрүҥҥэ уопут атастаһабыт. Онон бу быыстапка, биллэн турар, биһиэхэ үгүс сонун сүүрээни олоххо киллэрэргэ кынаттыаҕа, кэскиллээх тосхоллору торумнуурга «күөх уоту» уматыаҕа«, — диэн суруналыыстар ыйытыыларыгар хоруйдууругар анаан бэлиэтээтэ.
Бэрт интэриэһинэй быыстапкаҕа куорат оскуолаларын оҕолоро, устудьуоннар хото кэлбиттэр. Онон киһи бу аата ыччаттар инновацияны олус кэрэхсииллэрин туоһута диэн бэлиэтии көрөр.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриилэрэ