Суол-иис, тырааныспар инфраструктураларын биир кэлим сайдыытын былаанынан Саха сиригэр 16 аэропуорт саҥардыллыахтаах. Итилэртэн бу күннэргэ Нерюнгри оройуонун аэропуордун саҥа көтөр балаһата үлэҕэ киирдэ. Саха сиригэр Салгын тырааныспарын федеральнай агентствотын салайааччыта Александр Нерадько кэлэ сылдьар.
Ил Дархан Айсен Николаев Александр Васильевиһы кытары мунньахтыырыгар биһиги өрөспүүбүлүкэбит киэҥ-куоҥ сирдээҕинэн, ону сэргэ киин сиртэн ырааҕынан салгын тырааныспарын сайыннарыы тыын боппуруос буоларын, онуоха билиэт сыанатын субсидиялаан нэһилиэнньэҕэ чэпчэтиини оҥоруу хайаатар да барыахтааҕын эттэ. Санатан эттэххэ, билигин Дьокуускайтан, Мииринэйтэн, Нерюнгриттэн киин куораттарга көтүүгэ чэпчэтиилээх билиэттэр көрүллэн тураллар. Аны, өрөспүүбүлүкэ иһигэр субсидияны хаҥатыы барыахтаах. Бу туһунан СӨ бырабыыталыстыбата федеральнай агентствоны кытары эрдэ кэпсэтэн турар.
Магистральнай инфраструктуралары саҥардыы биир кэлим былаанынан Саха сиригэр барыта 16 аэропорт саҥардыллыахтаах. Улахан эбийиэктэртэн ааттаталаатахха, бу сайын Дьокуускай аэропуордун көтөр балаһата оҥоһуллубута. Ону сэргэ бу күннэргэ Нерюнгри оройуонун аэропуордун көтөр балаһата саҥардылынна.
Александр Нерадько олохтоох авиахампаанньалар тустарынан этэригэр, бу сайын киин куорат аэропуорда өрөмүөҥҥэ турбутун уонна ойуур баһаардара буола турар кэмнэригэр көтөргө усулуобуйа харгыстаммытын да иһин, “Якутия” авиахампаанньа сыалын-соругун толору ситиспитин, салгын тырааныспарынан көтүү тохтоло суох барбытын бэлиэтээтэ.
– Саха сиригэр авиацияны өйүүр саамай сөп. Онуоха олохтоох авиахампаанньаларга – “Якутия”, “Полярные авиалинии” хампаанньаларга – өйөбүл-тирэх буолуохха наада, кинилэргэ олоҕуран сайдыы барыахтаах. Бу икки хампаанньа тыйыс айылҕалаах, уустук усулуобуйалаах сиргэ үлэлии сылдьаллар. Биллэн турар, итиннэ кыһалҕалар бааллар. Билигин Саха сирин салалтатын кытары тэҥҥэ салгын тырааныспарын саҥардыы боппуруоһун быһаарыахпытын наада, – диэн иһитиннэрэр кини.
Мунньахха Ил Дархан дьоҕус авиацияны сайыннарыы боппуруостарын эмиэ туруорда. Бэлиэтээн эттэххэ, быйыл хотугу улуустарга “Ан-2” сөмөлүөтүнэн аһы-үөлү таһыы түмүгэр сыана лаппа түспүтэ, ону таһынан киин сиртэн ыраах сытар нэһилиэнньэлээх пууннарга ас-үөл таһыыта элбээбитэ. Онон сибээстээн дьоҕус авиацияны сайыннарыы, улуустарга сөмөлүөт түһэр сирин оҥоруу барыахтаах.
Аграфена КУЗЬМИНА