Суруналыыстыка — саамай кутталлаах идэлэртэн биирдэстэрэ. Дойдуга суруналыыстарга саба түһүү, кырбааһын, бэл диэтэр, өлөрүү сылын аайы тахсар. Оттон бэҕэһээ киэһэ бэйэлээх бэйэбит киин куораппытыгар «Якутия.Инфо» интернет-сайт эрэдээксийэтигэр саба түһүү таҕыста.
Ол туһунан «Якутия.Инфо» эрэдээксийэтэ бэйэтэ иһитиннэрбитинэн, үлэлиир сирдэригэр икки «быраат» арыалдьыттаах Саха сирин инники кэскилин пуондатын управлениетын урукку салайааччыта Николай Фомин көтөн түспүт. Кини бу сайтка бэчээттэммит «Алена Алексеева: куда подевался «Молодежный портал»?» диэн матырыйаалы сөбүлээбэтэҕин биллэрэн, «Ты зачем это разместил!» диэн баран, сайт сүрүн эрэдээктэрэ Денис Адамовы охсубут. Ону ааһан, суруналыыстарга туһаайан, подъезкытыгар тоһуйан бүөргүтүн сынньыахпыт диэн сааммыттар.
Фомин Адамовка «Ты чмо! Я тебя каждый день бить могу и мне ничего не будет!» дии-дии, хаста да охсубут.
Сайт таһаарааччы эрэдээктэрэ Тимофей Ефремов итини барытын устаары, төлөпүөнүн ылбытыгар, Николай Фомин аны киниэхэ саба түсүпүт, оттон кини куомуннааҕа суруналыыһы электрошокерынан уҥа ойоҕоһугар оҕустарбыт. Денис Фомины киэр анньан баран, харабыллары ыҥырбыт.
Айдааны истэн, аттынааҕы кэбиниэттэртэн үлэһиттэр сүүрэн кэлбиттэригэр, нүһэр «ыалдьыттар» атахха биллэрбиттэр.
Николай Фомин дьайыылара РФ Холуобунай кодексатын 144-с ыстатыйатынан, ол эбэтэр, «Суруналыыстар сокуоннай идэтийбит үлэлэрин харгыстааһын» диэҥҥэ сөп түбэһиэхтэрин сөп.
Бу бөрүкүтэ суох быһылаан төрдүнэн-төрүөтүнэн, үөһэ эппитим курдук, «Мисс Якутия-1996» кыайыылааҕа, билигин уопсастыбаннай үлэнэн дьарыктанар Алена Алексеева Инстаграм нөҥүө «Харысхал» аһымал пуонда посола, дьоро киэһэлэри ыытааччы Анна Фомина-Мироноваттан (ити Николай Фомин ойоҕо) Саха сирин ыччатын порталын үлэтин туһунан ыйытыыта буолбут.
Санатар буоллахха, Николай Фомин ыччат порталын сайтын оҥорорго 1 мөл. солк. суумалаах грант сүүйбүт. Сайт сыалынан ыччакка информационнай уонна методическай көмөнү оҥоруу буолуохтаах эбит. Ол эрэн, бу сайт 2016 сылтан үлэлээбэккэ турар.
Фомин Саха сирин инники кэскилин пуондатын управлениетын начальнигын дуоһунаһыттан бу сайын уурайан, индивидуальнай предприниматель буолбут.
Полиция
Дьокуускай куорат полициятын пресс-сулууспата иһитиннэрбитинэн, ыҥырыы киирээтин, суһал-силиэстийэлиир бөлөх уонна участковай боломуочунай ыйыллыбыт аадырыска тиийбиттэр. Бу чахчыга сыһыаннаах матырыйааллары хомуйаллар.
Денис Адамов:
— Дьокуускай куорат полициятын 2 №-дээх отделыгар икки сайабылыанньа киллэрбиппит.
Николай Фомин сибээскэ тахсыбат.
Силиэстийэ
Суруналыыстарга саба түһүү чахчытынан РФ Силиэстийэлиир кэмитиэтин Саха сиринээҕи управлениета бэрэбиэркэ ыытар. РФ Холуобунай кодексатын 144-с ыстатыйатынан көрүллэр дьайыылар баалларын-суоҕун. Бэрэбиэркэ түмүгүнэн процессуальнай уураах тахсыаҕа.
Редактортар сэбиэттэрэ
Саха сирин сүрүн эрэдээктэрин бассаап-бөлөҕөр бу быһылааны ырытыһан, СӨ ИДьМ-тын миниистирэ Владимир Прокопенко аатыгар сурук суруйарга быһаарбыттар. Бу дьыаланы тус хонтуруолугар ыларыгар көрдөһөн.
Суруналыыстар үлэлэригэр ким да харгыстыа, доруобуйаларыгар, олохторугар куттал суоһуо суохтаах!
Вера МАКАРОВА, «Саха сирэ» хаһыат, edersaas.ru
Хаартыскаҕа: «Якутия-Инфо» суруналыыстара Денис Адамов, Тимофей Ефремов.