Сайтпытыгар бүгүн, сэтинньи 4 күнүгэр, «Якутия.Инфо» суруналыыстарыгар саба түстүлэр» диэн иһитиннэриибит бэчээттэммитэ.
СӨ Борокуратууратын пресс-сулууспата:
— Өрөспүүбүлүкэ борокуруорун соруйуутунан, өрөспүүбүлүкэ борокуратуурата «Якутия.Инфо» ИА суруналыыстарыгар күүһү туттуу туһунан иһитиннэриинэн ыытыллыбыт силиэстийэ иннинээҕи бэрэбиэркэ матырыйаалларын бэрэбиэркэлээтэ. Ол түмүгэр, бэрэбиэркэ матырыйааллара полиция уорганнарыттан РФ Силиэстийэлиир кэмитиэтин Саха сиринээҕи управлениетыгар бэрилиннилэр. Сокуоннай уонна оруннаах быһаарыы тахсыыта борокуратуура хонтуруолугар сылдьар.
СӨ Ис дьыалаҕа министиэристибэтин пресс-сулууспата:
— «Якутия.Инфо» ИА офиһыгар тахсыбыт быһылаан чахчытынан суһал-ирдиир тэрээһиннэр ыытылыннылар. Хомуллубут матырыйааллар процессуальнай быһаарыы тахсарыгар, РФ Силиэстийэлиир кэмитиэтин Саха сиринээҕи управлениетыгар бэрилиннилэр.
Санатар буоллахха, Дьокуускай куоракка бэҕэһээ, сэтинньи 3 күнүгэр, «Якутия.Инфо» интэриниэт-сайт суруналыыстарыгар саба түһүү тахсыбыта.
Вера МАКАРОВА, «Саха сирэ» хаһыат, edersaas.ru