«Якутия.Инфо» дьыалата: административнай эрэ оҥорбуттар

Ааптар: 
Бөлөххө киир:

Сайтпытыгар 2017 сыл сэтинньи 4 күнүгэр «Якутия.Инфо» суруналыыстарыгар саба түстүлэр» диэн иһитиннэриибит бэчээттэммитэ. Онно туох туһунан суруйбуппутуй?

edersaas.ru

Төрдө-төрүөтэ

Ол туһунан сэтинньи 3 күнүгэр «Якутия.Инфо» эрэдээксийэтэ бэйэтэ иһитиннэрбитинэн, үлэлиир сирдэригэр икки «быраат» арыалдьыттаах Саха сирин инники кэскилин пуондатын управлениетын урукку салайааччыта Николай Фомин көтөн түспүт. Кини бу сайтка бэчээттэммит «Алена Алексеева: куда подевался «Молодежный портал»?» диэн матырыйаалы сөбүлээбэтэҕин биллэрэн, «Ты зачем это разместил!» диэн баран, сайт сүрүн эрэдээктэрэ Денис Адамовы охсубут. Ону ааһан, суруналыыстарга туһаайан, подъезкытыгар тоһуйан бүөргүтүн сынньыахпыт диэн сааммыттар.

Фомин Адамовка «Ты чмо! Я тебя каждый день бить могу и мне ничего не будет!» дии-дии, хаста да охсубут.

Сайт таһаарааччы эрэдээктэрэ Тимофей Ефремов итини барытын устаары, төлөпүөнүн ылбытыгар, Николай Фомин аны киниэхэ саба түспүт, оттон кини куомуннааҕа суруналыыһы электрошокерынан уҥа ойоҕоһугар оҕустарбыт. Денис Фомины киэр анньан баран, харабыллары ыҥырбыт.

Айдааны истэн, аттынааҕы кэбиниэттэртэн үлэһиттэр сүүрэн кэлбиттэригэр, нүһэр «ыалдьыттар» атахха биллэрбиттэр.

Онно Николай Фомин дьайыылара РФ Холуобунай кодексатын 144-с ыстатыйатынан, ол эбэтэр, «Суруналыыстар сокуоннай идэтийбит үлэлэрин харгыстааһын» диэҥҥэ сөп түбэһиэхтэрин сөп диэн сабаҕалааһын үөскээбитэ.

Бу бөрүкүтэ суох быһылаан төрдүнэн-төрүөтүнэн, үөһэ эппитим курдук, «Мисс Якутия-1996» кыайыылааҕа, билигин уопсастыбаннай үлэнэн дьарыктанар Алена Алексеева Инстаграм нөҥүө «Харысхал» аһымал пуонда посола, дьоро киэһэлэри ыытааччы Анна Фомина-Мироноваттан (ити Николай Фомин ойоҕо) Саха сирин ыччатын порталын үлэтин туһунан ыйытыыта буолбут.

Санатар буоллахха, Николай Фомин ыччат порталын сайтын оҥорорго 1 мөл. солк. суумалаах грант сүүйбүт. Сайт сыалынан ыччакка информационнай уонна методическай көмөнү оҥоруу буолуохтаах эбит. Ол эрэн, бу сайт 2016 сылтан үлэлээбэккэ турар.

Фомин Саха сирин инники кэскилин пуондатын управлениетын начальнигын дуоһунаһыттан ааспыт сайын уурайан, индивидуальнай предприниматель буолбут.

Болҕомто киинигэр

Биллэн турар, биһиги өрөспүүбүлүкэбитигэр суруналыыстарга итинник баламаттык саба түһүү аан бастакытын буолбутунан, быраабы араҥаччылыыр уорганнар бары тута «реакциялыы» охсубуттара (эбээһинэстэрэ да буоллаҕа).

Ыҥырыы киирээтин, суһал-силиэстийэлиир бөлөх уонна участковай боломуочунай ыйыллыбыт аадырыска тиийбиттэрэ. Бу чахчыга сыһыаннаах матырыйааллары хомуйан киирэн барбыттара.

Суруналыыстарга саба түһүү чахчытынан РФ Силиэстийэлиир кэмитиэтин Саха сиринээҕи управлениета бэрэбиэркэ саҕалаабыта. РФ Холуобунай кодексатын 144-с ыстатыйатынан көрүллэр дьайыылар баалларын-суоҕун.

Өрөспүүбүлүкэ борокуруорун соруйуутунан, өрөспүүбүлүкэ борокуратуурата «Якутия.Инфо» ИА суруналыыстарыгар күүһү туттуу туһунан иһитиннэриинэн ыытыллыбыт силиэстийэ иннинээҕи бэрэбиэркэ матырыйаалларын бэрэбиэркэлээн, бэрэбиэркэ матырыйаалларын полиция уорганнарыттан РФ Силиэстийэлиир кэмитиэтин Саха сиринээҕи управлениетыгар биэрбитэ. Уонна хонтуруолга ылбыта.

Маны таһынан, Саха сирин сүрүн эрэдээктэрдэрин бассаап-бөлөҕөр бу быһылааны ырытыһан, дьыаланы тус хонтуруолугар ыларыгар көрдөһөн, СӨ ИДьМ-тын миниистирэ Владимир Прокопенко аатыгар сурук суруйарга быһаарбыттара.

Оттон эмсэҕэлээбит суруналыыстар Денис Адамов уонна Тимофей Ефремов Дьокуускай куорат полициятын 2 №-дээх отделыгар сайабылыанньалары киллэрбиттэрэ.

Уһатыы-кэҥэтии, устунан уостуу

Дьэ, ити процессуальнай бэрэбиэркэлэрэ бэрт уһуннук ыытыллан, уһатыллан-тардыллан, кэмниэ-кэнэҕэс бэҕэһээ биллибитинэн, суруналыыстарга саба түһүү чахчытынан холуобунай дьыала тэриллибэтэх. Николай Фомиҥҥа «Кырбааһын» ыстатыйанан административнай дьыала тэриллибит.

 РФ Административнай кодексатын 6.1.1-с ыстатыйатынан («Кырбааһын») көрүллэр накаастабыл миэрэлэр — 5.000-30.000 сууммалаах ыстараап,  биитэр 10-15 сууккаҕа диэри административнай хаайыы, биитэр 60-120 чааска диэри болдьоххо булгуччулаах үлэ.  

«Якутия.Инфо» эрэдээксийэтэ:

— Биһиги бу уурааҕы кытта ончу сөпсөспөппүт — ити көннөрү күннээҕи иирсээн буолбатах этэ, чопчу суруналыыс идэтин утары дьайыылар уонна суоһурҕаныылар этэ. РФ Холуобунай кодексатын 144-с ыстатыйатыгар сөп түбэһэллэр. Бу уурааҕы утаран, Силиэстийэлиир кэмитиэккэ үҥсүү түһэрэбит. Өскөтүн маннык дьайыылар накаастаммакка хааллахтарына, сарсын атын эрэдээксийэлэргэ, суруналыыстарга итинник тиийэн, күүһү туттан баран ыстараабынан эрэ муҥурданыахтарын сөп.

Маны таһынан, биһиги билбиппитинэн, Хоруупсуйаны утары уопсастыбаннай кэмитиэт бэрэссэдээтэлин солбуйааччы Леонид Диодоров РФ Силиэстийэлиир кэмитиэтин Саха сиринээҕи управлениетыгар сайабылыанньа суруйбут. Ыччат порталын уонна Оҕолорго аналлаах порталлар тустарынан сонуннары киэҥник тарҕатар ситимнэргэ бэчээттэммит суруйууларынан бэрэбиэркэ ыыталларыгар көрдөһөн. Кини санаатынан, бу бырайыактары үбүлээһиҥҥэ хоруупсуйа бэлиэлэрэ көстөр курдуктар. Оччотугар, бу суруйуулар уонна Фомин дьайыылара быһаччы сибээстээх буолан тахсаллар.

Диодоров этэринэн, билигин кини сайабылыанньатынан силиэстийэ иннинээҕи бэрэбиэркэ барар.

Вера МАКАРОВА, «Саха сирэ» хаһыат, edersaas.ru

Хаартыскаҕа: «Якутия-Инфо» суруналыыстара Денис Адамов, Тимофей Ефремов, Николай Фомин.

+1
0
+1
0
+1
0
+1
0
+1
0
+1
0
+1
0