Сэтинньи 5 күнүттэн Росавиация олохтоох авиахампаанньа омук сиригэр көтөрүн баар итэҕэстэри көннөрүөр диэри 90 хонукка бопто. Ол төрүөтэ бэрэбиэркэ кэмигэр тахсыбыт араас итэҕэстэр: Boeing 737-800 сөмөлүөт көтөр кыаҕын туһунан сымыйа отчуот, техническэй хааччыллыыта суох дьону таһыы. Маны таһынан, салгын тырааныспарыгар баар мөкү өрүттэри ыйыллыбыт болдьох иһигэр көннөрбөтөхтөр диэн биэдэмистибэҕэ быһаараллар.
edersaas.ru
Бу ыйыллыбыт кэккэ кыһалҕалар дойду иһигэр уонна омук сиригэр көтөр рейстэр хойутааһыннарыгар тиэрдибит.
Авиахампаанньа сүрүн акционера – СӨ Баайы-дуолу, сири-уоту бас билиигэ министиэристибэтэ «Якутия» генеральнай, коммерческай дириэктэрин, дьону, таһаҕаһы тиэйии начаалынньыгын, сөмөлүөт техническэй туругар эппиэттиир үлэһиттэрин уураппыта даҕаны, балаһыанньа көнө илик.
Росавиация иһитиннэрэринэн, бу сыл бүтүөр диэри авиахампаанньа омук сиригэр көтөргө 450 билиэти атыылаабыт. «Ол харчытын толору кээмэйэ дьоҥҥо сокуон быһыытынан төннүөҕэ», — дииллэр.
Онон олохтоох авиахампаанньа аны өрөспүүбүлүкэ иһигэр уонна Уһук Илин, Арассыыйа киин куораттарыгар эрэ көтөр буолуоҕа.
СӨ Бырабыыталыстыбатын бэрэссэдээтэлин бастакы солбуйааччы Алексей Колодезников: «Якутия» авиахампаанньа сэртипикээтин былдьаан эрэллэр диэн сыаналыыр олоҕо суох. Росавиация итэҕэстэри көннөрөргө 90 хонугу биэрдэ, онон үлэ барар турар. Бастатан туран, дьон куттала суох көтүүтүн хааччыйарга кыһаллабыт», — диэн быһаарда кини.
Билиҥҥитэ «Якутия» Boeing 737-800 биэс, АН-24РВ алта, DHC-8-311 үс, RRJ-95LR-100 түөрт сөмөлүөттээх. 2018 с. тоҕус ыйыгар 679,9 тыһ. дьону тиэйбит, сыл иннинээҕи көрдөрүү икки бырыһыанынан түспүт. 35 авиахампаанньа ортотугар «Якутия» 18 миэстэҕэ турар.
Авиахампаанньа Иркутскай нөҥүө Кытайга, Японияҕа, Соҕуруу Кореяҕа регулярнай, онтон Москваттан Европаҕа чартернай рейстэри оҥорор этэ.
Марианна Тыртыкова, «Саха сирэ» хаһыат, edersaas.ru