«Якутия» авиахампаанньа «Sukhoi Superjet 100» сөмөлүөт туһунан санаатын үллэһиннэ...
Олох-дьаһах

«Якутия» авиахампаанньа «Sukhoi Superjet 100» сөмөлүөт туһунан санаатын үллэһиннэ

Өрөбүл киэһэ, ыам ыйын 5 күнүгэр Москва куорат Шереметьево аэропуордуттан Мурманскайга көтөн испит SU1492 рейс экипаһа «Sukhoi Superjet 100» сөмөлүөт салгыы көтөр кыаҕа суоҕун, онон төттөрү аэропуорка төннөрүн туһунан иһитиннэрбитэ. Онтон көтөр аал сири кытта сибээһэ сүтэн, экипаж төннөргө быһаарыммыт, түһэригэр тумсунан охсуллан умайан тахсыбытын түмүгэр, 78 киһиттэн 41-рэ суорума суолланна. РФ Силиэстийэлиир кэмитиэтэ иһитиннэрэринэн, 37 киһи тыыннаах хаалбыт.

edersaas.ru


«Аэрофлот» авиахампаанньа Ыксаллаах быһыыга-майгыга штаб тэрийэн, быһылаан туохтан тахсыбытын үөрэтэр. Биир өттүнэн чаҕылҕан охсон, сөмөлүөт мотуора умайыан сөп, ол иһин көтөр аалы салайар автоматика аккаастыыр диэн сабаҕалыыллар. Экипаж чааска 300 килэмиэтир түргэннээх көтөн испит сөмөлүөтү аспаал бүрүөһүннээх балаһаҕа кытаанахтык түһэрэн, сиргэ охсулларыгар шасси тимирдэрэ уматык бааҕын дьөлөн, умайыы тахсыбыт буолуон сөп диэн быһаараллар.

Сөмөлүөт саахалын Бырабыыталыстыба, авиационнай бырамыысыланнас, ФСБ, Генеральнай Борокуратуура үлэһиттэрэ састааптаах анал хамыыһыйа чинчийиэҕэ.

Дойду Аҕа баһылыга Владимир Путин ыар сүтүктээхтэргэ кутурҕанын биллэрдэ.

Росавиация бу быһылааны үөрэтэн баран SSJ 100 сөмөлүөттэр көтүүлэрин быстах кэмҥэ тохтотуон сөп диэн этэллэр.

«Якутия» авиахампаанньаҕа «Sukhoi Superjet 100» сөмөлүөттэр эмиэ бааллар.

«Бу быһылаан туохтан тахсыбытын үөрэтэр официальнай чинчийии бүтүөн иннинэ «Якутия» авиахампаанньа «Sukhoi Superjet 100» сөмөлүөттэри тохтоторун туһунан быһаарыныы ылыммат. Бу сөмөлүөт тэхиньиичэскэй туругун кыраҕытык кэтээн көрөн, көтөр экипаһы кытта эбии дьарык ыытыллыаҕа. Салгыҥҥа куттала суох айан – биһиги сүрүн сыалбыт-сорукпут», —  диэн «Якутия» авиахампаанньаттан иһитиннэрдилэр.

Марианна ТЫРТЫКОВА, «Саха сирэ» хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

4 × 5 =