«Якутия» атомнай ледокол ууга устарга бэлэм буолуоҕа

Бөлөххө киир:

“Балтийскай собуот” АУо исписэлиистэрэ “Якутия” атомнай ледоколга үлэни түмүктээтилэр. Сотору кэминэн мууһу бэйэтэ солоон айанныыр хараабылы оҥорооччулар куорпуһу хомуйууну бүтэриэхтэрэ, “Якутия” атомнай ледокол ууга устара бэлэм буолуо.

edersaas.ru

«Хотугу муора суола сайдарынан, хотугу сиргэ таһаҕаһы таһыы эрэ буолбакка, Арктикаҕа бырамыысыланнас кииннэрин сайыннарыы боппуруостара быһаарыллыахтара. Сүрүн хайысханан саахал-быыһыыр систиэмэни модернизациялааһын уонна саахал-быыһыыр флоту тэрийии буолаллар. Ону таһынан, суудунаны оҥорор уонна өрөмүөннүүр тэрилтэлэргэ  каадырдары бэлэмнииргэ, холбоһуктаах научнай-тиэхиньиичэскэй чинчийиилэри уонна бырайыактары ыытарга  бииргэ үлэлээһини кэҥэтиэххэ уонна бөгөргөтүөххэ наада”, — диэн өрөспүүбүлүкэ Ил Дархана Айсен Николаев бэлиэтээн эттэ.

Муустаах  пояс – үс миэтэрэ курдук кэтиттээх зона, бу зонаҕа атомнай ледокол мууһу кытта харсыһарыгар муҥутуур ноҕурууска бэриллэр. Суудуна бу сиэксийэлэрин 40 миллиметр халыҥнаах ыстаалтан хомуйаллар. 84 туонна симиллибит сиэксийэтэ Арктика мууһун охсуутун бастакынан көрсүөҕэ.

“Якутия” универсальнай атомнай ледокол — 22220 бырайыак төрдүс суудуната, үлэ 2020 сыл ыам ыйыгар саҕаламмыта. Суудуна “Атомфлот” ФГУП-“Росатом” судаарыстыбаннай корпорация тэрилтэтин сакааһынан тутуллар. Атомоход уһуна — 173,3 миэтэрэ, кэтитэ – 34 миэтэрэ.

22220 бырайыак дэгиттэр атомнай ледоколлар — аан дойдуга саамай улахан уонна күүстээх суудуналар. Кинилэр сүрүн соруктара – Арктика  арҕаа оройуонугар навигация сылы быһа ыытыллыытын хааччыйыы. Бу бырайыак суудуналара чугастааҕы сылларга Арассыыйа гражданскай ледокольнай флотун төрүтүнэн буолуохтаахтар.

Надежда ЕГОРОВА, “Саха сирэ”, edersaas.ru

+1
0
+1
0
+1
0
+1
0
+1
0
+1
0
+1
0