Атырдьах ыйын 16 күнүгэр Дьокуускай куоракка кибатлетикаҕа өрөспүүбүлүкэтээҕи бастакы чөмпүйэнээт ыытылынна. Сотолоругар протезтаахтар ортолоругар “Якутия 24” ханаал үлэһитэ Артем Лавров бастаата.
Кибатлеттар күрэстэрэ “Кыайыы 50 сыла” спорт дыбарыаһыгар буолан ааста. Манна илиилэригэр, атахтарыгар уонна өттүктэригэр протезтаах диэн үс дисциплинаҕа араҕыстылар.
Чөмпүйэнээккэ Хаҥалас, Өймөкөөн, Амма, Ленскэй оройуоннарыттан уонна Дьокуускай куораттан кэлэн кытыннылар.
“Протезтаах киһиэхэ трасса балай даҕаны уустук. Күннээҕи олохпутугар көрсүөхпүтүн сөп мэһэйдэри уурбуттар. Миигин өйүүргүтүн истибитим, ол иһин сорудахтары түргэнник уонна үчүгэйдик оҥоро сатаатым”, – диэн “Якутия 24” ханаал медиабылаан редактора Артем Лавров кэпсээтэ.
Кибатлеттар мэһэйдэрдээх анал трассаны туораатылар. Сорудахтара күннээҕи олоххо маарынныыр, холобур, атахтарыгар протезтаах дьон олороллор, олоппостон тураллар эбэтэр илиилэригэр протезтаахтар лаампа эрийэллэр.
Саха сирэ бүтүн Уһук Илин үрдүнэн аан бастакытын бу чөмпүйэнээти ыытта. Өрөспүүбүлүкэҕэ өссө да бу спорт саҥа көрүҥүн сайыннарар былааннаахтар.
“Биһиги, биллэн турар, өйүөхпүт. Дьоммутун-сэргэбитин спорка эрэ буолбакка, олоххо тардар өссө биир көрүҥмүт буоллаҕа. Ону таһынан доруобай дьон дьарыктанарыгар, сайдарыгар холобур буолар”, – диэн физическэй култуура уонна спорт миниистирэ Иннокентий Григорьев эттэ.
Кибатлетика диэн илиилэригэр, атахтарыгар протезтаах дьон кыахтарын төһө туһаналларыгар күрэхтэһэллэр. Кыттааччылар мэһэйдэрдээх трассаны туорууллар.