Бүгүн Дьокуускай куорат федеральнай суутугар ис дьыала урукку миниистирэ, полиция генерал-майора Яков Стаховка бириигэбэр таҕыста. Дьыаланы судьуйа Алексей Сараев 2017 сыл атырдьах ыйыттан көрөн саҕалаабыта.
Туохтан саҕаламмытай? Хайдах этэй?
Бу дьыала 2011 сыллаахха РФ Холуобунай кодексатын 285-с ыстатыйатынан тэриллибитэ. Ол эбэтэр, дуоһунас боломуочуйатынан туһаныы бэлиэтэ баарынан.
Силиэстийэ биэрсийэтинэн, Стахов 2007 сыллаахха «АЛРОСА» АК Ис дьыала министиэристибэҕэ биэрбит «Мерседес Бенц 400 SEL» джип массыынатын аймаҕар ылбыт.
2012 сыллаахха ханна да барбат баппыысканан сылдьыбыт уорабаланааччы силиэдэбэтэлгэ доппуруоска ыҥырыллыбыт күнүгэр Москва куоракка күрээн хаалбыта. Миниистир дуоһунаһыттан кинини ити сыл муус устар ыйыгар босхолообуттара.
Генералы федеральнай уонна норуоттар икки ардыларынааҕы ирдэбилгэ биллэрбиттэрэ.
Ол күрүөҕүттэн, хас да сыл устатыгар кини ханна сылдьарын туһунан араас сурах-садьык эрэ хам-түм биллэн ааһара. Бүтэһигин 2016 сыл балаҕан ыйыгар манна, Дьокуускайга, кини курдук дьүһүннээх киһи атыы-эргиэн киинин видеокамератыгар уһуллубутун интернет ситиминэн тарҕата сылдьыбыттара.
Онуоха ИДьМ “кини буолбатах, атын киһи” диэн быһаарыы биэрбитэ.
Түөрт сылы быһа куота-саһа сылдьыбыт генерал 2016 сыл алтынньы 12 күнүгэр силиэстийэ уорганнарыгар бэйэтэ кэлэн, буруйун билинэн, дьыаланы силиэстийэлээһин хат сөргүтүллүбүтэ. Стаховы хааччахтыыр миэрэ быһыытынан, Силиэстийэлиир изоляторга хаайбыттара.
2016 сыл алтынньы 21 күнүгэр киниэхэ буруйдааһын тиксэриллибитэ.
Буруйун бэйэтэ кэлэн, толору билиммитин, хайдах быһыыга-майгыга оҥорбутун туһунан сиһилии көрдөрүү биэрбитин учуоттаан, ханна да барбат баппыысканан таһаарбыттара. Силиэстийэ кэмигэр массыына Ис дьыала министиэристибэтигэр төннөрүллүбүтэ.
2016 сыл сэтинньи 11 күнүгэр буруйданааччы Яков Стахов хадатаайыстыба киллэрбитэ. Дьыалабын сабыҥ диэн ис хоһоонноох. 2015 сыллаахха РФ Госдумата Улуу Кыайыы 70 сылынан биллэрбит амнистиятыгар олоҕуран. Ити амнистияҕа кыра уонна орто буруйу оҥорбут, судаарыстыбаннай наҕараадалардаах уонна 55 саастаах буруйданааччылар эмиэ хапсалларынан сибээстээн.
Силиэдэбэтэл ити хадатаайыстыбаны өйөөн, холуобунай дьыаланы сабар туһунан быһаарыы таһаарбыта. Реабилитацияланар быраабы биэрбэккэ туран.
РФ бэрэсидьиэнин 2015 сыл алтынньы 5 күнүнээҕи ыйааҕынан, Саха Өрөспүүбүлүкэтин ис дьыалаҕа миниистирин дуоһунаһа РФ субъегын судаарыстыбаннай дуоһунаһыгар киирсибэтинэн сибээстээн диэн, Стахов буруйданар ыстатыйатын чааһын уларыппыттара – 2-с чааһы 1 чааска. Ол эбэтэр, дуоһунастаах киһи ымсыы санааттан сулууспатын боломуочуйатын сулууспатын интэриэһин утары туттан, тэрилтэ сокуоннай быраабын уонна интэриэһин кэһиини таһаарбыт диэн. Оҥорбут буруйа дьыалаҕа хомуллубут дакаастабылларынан толору бигэргэнэр диэбиттэрэ.
РФ Госдумата Улуу Кыайыы 70 сылынан биллэрбит амнистията 2015 сыл муус устар 24 күнүгэр олоххо киирбитэ уонна сыл аҥарынан түмүктэммитэ. Ол эрээри, кэккэ буруйдарга, өскөтүн буруй амнистия биллэриллиэн иннинэ оҥоһуллубут биитэр дьыала амнистия биллэриллибит кэмигэр силиэстийэлэнэ сылдьыбыт буоллаҕына, ол дьайыылаах буолан, Стахов амнистияҕа хапсыбыта.
Ол эрэн, былырыын, 2017 сыл муус устар ыйыгар, РФ Силиэстийэлиир кэмитиэтин Саха сиринээҕи управлениета ити 285-с ыстатыйа 1 чааһын 159-с ыст. 3-с чааһыгар, ол эбэтэр, түөкүннээһиҥҥэ уларыппыта. Яков Стахов ити буруйдааһыны билиммэтэҕэ, «дело сфабриковано» диэбитэ.
Суут саалатыгар
Бүгүн судьуйа Сараев бириигэбэри сарсыарда 9.30 мүн. саҕалаан, күнүс 13.00 чаас саҕана ааҕан бүтэрдэ. Быыһыгар, 10 мүнүүтэлээх тохтобул биллэриллэн ылбыта. Суут саалатыгар олус итии буолан, түннүктэр аһаҕастар, онон таһырдьааҥҥы, массыыналар кэлэр-барар тыастара-уустара мэһэйдиир буоланнар, судьуйа бэйэтэ да кыра саҥата ончу иһиллибэккэ эрэйдээтэ. Стахов холкутук, дьоһуннаахтык туттан турар. Ордук хос саҥа-иҥэ суох.
Суут Яков Стаховы «Түөкүннээһин» ыстатыйанан буруйдааҕынан билинэн, 4 сылга көҥүлүн быһары усулуобунайынан ааҕан, 2 сыл 6 ыйга тургутар болдьоххо уурда. Ыстарааба суох. Маны таһынан, полиция генерал-майор званиетын быһарга уурда.
Судьуйа: — Приговор понятен?
Стахов: — Очень понятен. Спасибо.
Сууттаммыт Яков Стахов бириигэбэр кэнниттэн суруналыыстарга комментарийа:
— Биллэн турар, бу бириигэбэри Үрдүкү суукка ааһынабыт. Мин званиебын быстылар эрээри, син биир генералынан хаалабын! 40 сыл устата ис дьыала уорганнарыгар сулууспалаабытым, «итии туочукаларга» сылдьыбытым, миигин убаастыыллар! Мин олус хомойобун, силиэстийэ уорганнара да, борокуратуура да, суут да тутулуктаахтарыттан! Син биир тиһэҕэр диэри охсуһуом, буруйа суохпун дакаастыам!
Вера Макарова, «Саха сирэ» хаһыат, edersaas.ru
Хаартыскаларга: Яков Стахов адвокаттарын кытта суут дьиэтиттэн таҕыстылар.
Вера Макарова түһэриилэрэ.
