Тыа хаһаайыстыбатын министиэристибэтигэр норуот хаһаайыстыбатын үтүөлээх үлэһитэ, Сунтаар уонна Өлүөхүмэ улуустарын Бочуоттаах олохтооҕо, партийнай үлэһит, суруналыыс Яков Семенов кэриэһигэр анаммыт өйдөбүнньүк киэһэ буолан ааста.
Яков Алексеевич Семенов Сунтаар улууһун Кириэстээҕэр төрөөбүтэ. 1953 с. Омскайдааҕы тыа хаһаайыстыбатын институтун бүтэрэн, бастаан Дүпсүннээҕи МТС-ка, онтон тыа хаһаайыстыбатын министиэристибэтигэр үлэлээбитэ.
Кылаабынай агрономтан саҕалаан ССТХНЧИ дириэктэри солбуйааччынан, Орджоникидзевскай оройуон производственнай территориальнай управлениетын начальнигынан, миниистири солбуйааччынан, 1965-1970 сс. миниистиринэн, 1970-1984 сс. ССКП Өлүөхүмэтээҕи райкомун бастакы сэкиритээринэн таһаарыылаахтык үлэлээбитэ. Кини сирэй туруорсуутунан 1984 с. Өлүөхүмэтээҕи заповедник тэриллибитэ. 1966 — 1984 сс. ССКП обкомун чилиэнэ этэ, Саха АССР Үрдүкү Сэбиэтин дьокутаатынан биэс төгүл талыллыбыта. Өктөөп өрөбөлүүссүйэтин, «Бочуот знага» уордьаннарынан, элбэх мэтээллэринэн наҕараадаламмыта. Уопсастыбаннай олоххо көхтөөхтүк кыттара, суруналыыс, суруйааччы быһыытынан биллибитэ, саха чулуу дьонун итиэннэ Саха сирин кэрэ айылҕатын, кини көмүскэлин туһунан элбэх кинигэлэри суруйбута.
Дьоро киэһэҕэ Яков Семенов кэргэнэ Анна Афанасьевна, оҕолоро, сиэннэрэ, доҕотторо муһуннулар. Яков Алексеевич 90 сааһынан кини урукку өттүгэр бэчээттэнэ илик ыстатыйаларын, доҕотторун ахтыыларын түмэннэр «Тахсыбатах санаалар» диэн кинигэни таһаарбыттар.
Кэлэр өттүгэр кини аатын үйэтитэн уонна тыа хаһаайыстыбатын сайынарыыга үлэтин-хамнаһын сыаналаан, «Семенов ааҕыылара» диэн дьаһалы тэрийэргэ этии киллэрдилэр.
Раиса Сибирякова, «Саха сирэ» хаһыат, edersaas.ru