Бэс ыйын 24 күнүнээҕи түмүгүнэн, өрөспүүбүлүкэ хаһаайыстыбалара ыһыыны барыта холбоон 46 тыһ. 48 гектарга ыстылар, ол эбэтэр былааннарын 94,8 % толордулар.
edersaas.ru.
– Ыһыы үлэтэ сүрүннээн түмүктэннэ, үгүс хаһаайыстыбалар ыһыыларын бэс ыйын бастакы дэкээдэтигэр бүтэрбиттэрэ. Бурдук 10 тыһ. 957 гектарга ыһыллан, былаан 105 % толорулунна. Сүөһү сиир култуурата 27 тыһ. 267 гектарга ыһылынна, ити былаан 89,8 %-а. Хортуоппуй 6 тыһ. 506 гектарга, оҕуруот аһа 1 тыһ. 316 гектарга олордулуннулар, ол эбэтэр былаан 102 % толорулунна, —— диэн кэпсээтэ тыа хаһаайыстыбатын миниистирэ Александр Атласов.
Быйыл тыа хаһаайыстыбатын култууратын 48,5 тыһ. гектарга ыһарга былааннаммыта. Ол иһигэр, бурдугу 10,4 тыһ. гектарга, сүөһү сиир култууратын 30,4 тыһ. гектарга, хортуоппуйу 6,4 тыһ. гектарга, аһаҕас буорга олордуллар оҕуруот аһын 1,3 тыһ. гектарга олордор сорук турбута. Санатан эттэххэ, аһаҕас буорга олордуллар оҕуруот аһа бэс ыйын 20 күнүгэр диэри олордуллар, оттон сүөһү сиир култуурата суордуттан көрөн, ыам ыйын 30 күнүттэн от ыйын 10 күнүгэр диэри ыһыллар.
Раиса Сибирякова, «Саха сирэ» edersaas.ru.