Икки сыллааҕы тохтобул кэнниттэн быйыл ыһыахтар нэһилиэнньэлээх пууннарга барыларыгар ыытыллыахтара. Бу туһунан Ил Дархан Айсен Николаев “Саха” НКИХ биэриитигэр иһитиннэрдэ.
“Быйыл нэһилиэнньэлээх пууннарга барыларыгар ыһыахтар урукку курдук киэҥ тэрээһиннээхтик ыытыллыахтара. Бары да бу сайыҥҥы сүрүн тэрээһиммитин кэтэһэ олоробут. Ыам ыйынааҕы тэрээһиннэргэ, Үлэ бырааһынньыгар, Кыайыы күнүгэр, дьон-сэргэ өрө көтөҕүллэн туран кыттыбытын көрөр олус үчүгэй этэ. Билигин дьаҥтан-дьаһахтан харыстанарга сорох миэрэлэр бааллар да, итилэр сотору кэминэн эмиэ уһуллуохтара дии саныыбын. Саамай сүрүнэ бары чэгиэн, доруобай сылдьыаҕын”, – диэн этэр Айсен Николаев.
Санатан суруйдахха, быйыл өрөспүүбүлүкэтээҕи ыһыахтар — Олоҥхо ыһыаҕа Үөһээ Бүлүүгэ бэс ыйын 20-21 күннэригэр, Туймаада ыһыаҕа бэс ыйын 25-26 күннэригэр ыытыллыахтара.
Аграфена КУЗЬМИНА