Сүүрбэ иккис төгүлүн ыытыллар Туймаада ыһыаҕа Дьокуускайга — Сомоҕолоһуу, Арассыыйаҕа — Тыйаатыр сылын иитинэн ыытыллар. Икки күн улуу Туймаада хочотугар, Үс Хатыҥ кырдалыгар 27 түһүлгэнэн тиһиктээхтик салҕанар сүүстэн тахса тэрээһин арааһыгар дьон-сэргэ түмүстэ. Үөрүү-көтүү өрөгөйдөөтө.
Үс Хатыҥ киэркэйбит түһүлгэтигэр быйыл тыһыынчаттан тахса ыҥырыылаах ыалдьыттар араас дойдуттан, Арассыыйа куораттарыттан, эрэгийиэннэртэн мустубуттар.
Олоҥхонон саҕаламмыт ыһыахха эрэкэ-дьэрэкэ оҕолор үҥкүүлээн тэйдилэр. Кырааскалаах тумустаах, кырыылаах харахтаах кыталык кыргыттар, туруйа уолаттар, дуолан бухатыырдар күөх хонууга бар дьону эҕэрдэлээн биир тэҥник хамсанан аал уокка айах тутар кэм тосхойбутун биллэрдилэр, уруйга угуйдулар, айхалга ыҥырдылар. Ити кэннэ алгыс баһа сыаланна, торҕо буруо унаарыйда, уйгу-быйаҥ олохтонно.
Ыраахтан-чугастан мустубут ыалдьыттары Ил Дархан Айсен Николаев, Дьокуускай куорат баһылыга Сардаана Авксеньева итии-истиҥ тылларынан эҕэрдэлээтилэр.
Ил Дархан Айсен Николаев Эллэй эһэбит саҕаттан ыһыллыбыт ытык-мааны ыһыахпыт саха норуота эйэлээх санаалааҕын, модун күүстээҕин туоһулуурун бэлиэтээтэ. Саха сирэ тэтимнээхтик сайдан, уларыйан үтүө холобур буоларыгар баҕарда. «Сайдыы суолунан дьулуурдаахтык барыаҕыҥ. Уйгу-быйаҥ ыһыахпыт алгыһа бука барыгытыгар тиийдин, бука барыгытыгар көмөлөстүн», — диэн эттэ. Куорат баһылыга Сардаана Авскентьева икки күннээх ыһыах маанылаах түһүлгэтигэр мустубут ыалдьыттар дуоһуйа сынньанан күүс-сэниэ ылалларыгар баҕарда.
Дьон-сэргэ сомоҕолосто, үөрүү-көтүү өрөгөйдөөтө, оһуохай оройуттан тутулунна, ырыа ыраахха дьиэрэйдэ.
Быйылгы үрүҥ тунах ыһыах ыҥырыылаах ыалдьыттарынан Уһук Илиннээҕи Федеральнай уокурукка Арассыыйа Бэрэсидьиэнин боломуочуйалаах бэрэстэбиитэлэ Григорий Куранов, Хэйлунцзянтан (КНР) Сун Сибинь, ССРС Дьоруойа, летчик-космонавт Анатолий Арцебарскай, СӨ бырабыыталыстыбатын бэрэссэдээтэлэ Владимир Солодов, СӨ Судаарыстыбаннай мунньаҕын (Ил Түмэн) бэрэссэдээтэлэ Петр Гоголев, уо.д.а. буолаллар.
Хаартыска: СИА