Уһун кыһыны этэҥҥэ туоруурбутугар күүс-уох ылынар туһугар, төрүт үгэспитигэр олоҕуран, куйаар ситимин нөҥүө ыһыах ыһабыт. Үтүө алгыһы истэн, өйбүт-санаабыт чэбдик, бэйэбит чэгиэн буолабыт.
Ол да буоллар, коронавирус дьаҥа өссө да сүтэ илик. Ол курдук, ааспыт сууккаҕа Саха сиригэр 87 киһи ыалдьыбыт. Итинтэн Дьокуускайга 62 киһи ыалдьыбыта бэлиэтэммит. Ыарыы аны, тыа сирин нэһилиэктэригэр кутталы үөскэтэр. Маны сэргэ, Мииринэйгэ – 10, Намҥа – 5 киһи бу дьаҥҥа хаптарбыт. Уус Алдаҥҥа, Хаҥаласка үстүү киһи ыалдьыбыт, Нерюнгрига – 2. Бүлүүгэ уонна Мэҥэ Хаҥаласка биирдии киһи дьаҥнаабыт.
Ыһыах күн 46 киһи үтүөрдэ. Кинилэртэн 38 киһи Дьокуускай олохтооҕо. Алдаҥҥа, Мэҥэ Хаҥаласка үстүү киһи үтүөрэн, балыыһаттан таҕыстылар. Өймөкөөҥҥө уонна Намҥа – 1 киһи. Уопсайа бу кэмҥэ диэри өрөспүүбүлүкэ үрдүнэн 2439 киһи эмчиттэр көмөлөрүнэн үтүөрдэ. Ити ыарахан дьаҥы эмтээһин ньыматын баһылааһын, сэрэтэр үлэ, хааччахтыыр миэрэлэр киэҥник ыытыллалларын түмүгэр ситиһиллэр.
Суукка устата өрөспүүбүлүкэ лабораториялара 3729 тиэһи оҥордулар.
Билиҥҥи туругунан 28 киһи ыарахан туруктаах. Кинилэр үтүөрэллэригэр баҕарабыт.
Женни СТРЮКОВА
Хаарытскаҕа: интэриниэттэн