Муус устар 2-3 күннэригэр СӨ Үлэҕэ уонна социальнай сайдыыга министиэристибэтэ «Аҕа күрэҕэ» аҕалар уонна уолаттар өрөспүүбүлүкэтээҕи XXII күрэхтэрин ыытар.
Быйылгы күрэх САССР төрүттэммитэ 100 сылыгар уонна өрөспүүбүлүкэҕэ Ийэ сылыгар ананар. Өрөспүүбүлүкэ улуустарыттан саамай хорсун уонна күүстээх аҕалаах уол күүстэрин холонор уонна бастакы миэстэ иһин киирсэр «Аҕа күрэҕэ» ыытыллыбыта 22 сыл буолла. Күрэх аҕа оруолун уопсастыбаҕа күүһүрдэр, үгэс буолбут култуурунай уонна дьиэ кэргэн сыаннастарын, аҕа буолуу эппиэтинэһин уонна ыччаты иитиини өрө тутар соруктаах.
Успуорт бырааһынньыгын ыытарга сүрүн министиэристибэни кытары СӨ Физическэй култуураҕа уонна успуорка, Үөрэхтээһиҥҥэ уонна наукаҕа министиэристибэлэр, Чурапчы улууһа, «СӨ аҕаларын лигата» уопсастыбаннай тэрилтэ кытталлар. Күрэххэ аҕаттан уонна кини 14-17 саастаах уолуттан турар хамаандалар кытталлар.
Икки түһүмэҕинэн ыытыллар. 1 түһүмэх — кулун тутар 26-27 күннэригэр сүүмэрдиир туур (оройуоннааҕы уонна куораттааҕы күрэхтэһиилэр). II түһүмэх – түмүк күрэхтэһии муус устар 2-3 күннэригэр Чурапчы улууһун Сылаҥ сэлиэнньэтигэр буолуоҕа.
Түмүк күрэхтэһиигэ улуустарга уонна куорат уокуруктарыгар кыайбыт хамаандалар киллэриллэллэр. Улуустартартан кэлбит хамаандалар икки күн устата 7 түһүмэҕинэн күрэхтэһиэхтэрэ:
— дьиэ кэргэни билиһиннэрии;
— бэрэбинэни суоруу;
— маһы бэлэмнээһин;
— ойбону алларыы;
— остуолбаҕа тахсыы;
— чэй иһэргэ кутааны уматыы.
Күрэх түмүгүнэн судьуйалар кэллиэгийэлэрэ «Аҕа күрэҕэ» аҕалар уонна уолаттар өрөспүүбүлүкэтээҕи XXII күрэхтэрин кыайыылааҕын быһаарыаҕа. Кыайыылаах хамаандалар ылыахтара:
1 миэстэҕэ – квадроцикл бирииһи;
2 миэстэҕэ -– матасыыкыл бирииһи;
3 миэстэҕэ -– Чурапчы улууһун баһылыгыттан анал бирииһи.
Үһүс миэстэттэн ураты кыттааччылар эмиэ тэрийээччилэртэн уонна спонсордартан анал бириистэринэн наҕараадаланыахтара.
Күрэх балаһыанньатын манна билсиэххэ сөп: https://rcmtykt.ru/images/imperavi/page/62147c095e9c0.pdf
Надежда ЕГОРОВА, «Саха сирэ», edersaas.ru
СӨ Үлэҕэ уонна социальнай сайдыыга министиэристибэ хаартыскалара