XVIII үйэ хараабылын куоппуйата Саха сиригэр аҕалылынна

Ааптар: 
Бөлөххө киир:

XVIII үйэҕэ устубут суудуна куоппуйата аҕалыллан, Дьокуускайга Ем.Ярославскай аатынан музей тиэргэнигэр тиэрдилиннэ.

Музей дириэктэригэр Николай Бугаевка төлөпүөннээн ыйыталаспыппар:

— Кэлэр нэдиэлэттэн дьон-сэргэ кэлэн таһыттан көрүөн-истиэн сөп. Онтон өссө төгүл сиһилии бэрэбиэркэ кэнниттэн көҥүл бэрилиннэҕинэ, үп көрүлүннэҕинэ, баарыстарын чөлүгэр түһэрэн баран, өрүскэ устар гына оҥоруохха сөп, — диэн ураты сонуну иһитиннэрдэ.

XVIII үйэҕэ  «Якуцкъ» Хотугу эспэдииссийэ чинчийиигэ сылдьыбыт суудунатын (хараабылын) үкчү гына оҥорон, куоппуйатын Петрозаводскайтан Саха сиригэр аҕаллылар. Маны Ем.Ярославскай аатынан хотугу норуоттар историяларын уонна культураларын холбоһуктаах Саха судаарыстыбаннай музейыгар туруордулар. Бу туһунан СӨ Бырабыыталыстыбатын бэрэссэдээтэлэ Андрей Тарасенко иһитиннэрдэ.

СӨ Ил Дархана Айсен Николаев эрдэ бэлиэтээбитинэн, Саха АССР 100 сылынан далааһыннаах бырайыактар олоххо киллэриллэллэр — социальнай суолталаах эбийиэктэр тутуллаллар, өрөмүөннэнэллэр, наука уонна култуура тэрээһиннэрэ ыытыллаллар, архитектура пааматынньыктара чөллөрүгэр түһэриллэллэр, саҥардыллаллар.

—Манна аҕаларга бэлэмнэнии 2021 сыл ахсынньы ыйтан саҕаламмыта. Онно Петрозаводскай музейын акваториятыттан Онежскай собуокка тиксэрэр сиргэ аҕалан мууһун-хаарын ыраастаабыттара, кыраан бэлэмнээбиттэрэ. Туох баар сөбүлэҥ түһэрсиллибитин кэнниттэн, хайдах аҕаларга үлэ ыытыллыбыта, — диэн сырдатар Андрей Тарасенко.

Санатан эттэххэ, 2016 сыллаахха Карелияҕа суудунаны тутар, өрөмүөннүүр сиргэ, XVIII үйэ чертеһа хараллан хаалбытынан «Якуцкъ» дубель-шлюпкатын куоппуйатын үтүгүннэрбиттэр. Хараабылы СӨ норуодунай суруйааччыта Владимир Федоров «Созвездие Марии» пьесатынан «Первые» диэн историческай киинэҕэ уһулбуттар. Кэнники биэс сыл Петрозаводскайга муора музейыгар кытылга турбут. 16 эрдиилээх, баарыстардаах хараабыл Карелия бэһиттэн оҥоһуллубут.

Маннык тэрилинэн чинчийээччилэр Хотугу эспэдииссийэҕэ сылдьыбыттар. «Якуцкъ» 1735 сыллаахха бэс ыйын 30 күнүгэр айанын саҕалаабыт, Саха сириттэн муустаах акыйааҥҥа тиийэ барбыт. Лаптевтар муораларын уонна Өлүөнэ эбэ муораҕа түһэр салаатын чинчийбиттэр. Историяҕа киирбит суудунанан Василий Прончищев, Харитон Лаптев, Семён Челюскин айаннаабыттара биллэр.

+1
0
+1
0
+1
0
+1
0
+1
0
+1
0
+1
0