Дьокуускайга ыытыллар «World Skills» cүүмэрдиир күрэхтэһиитигэр 57 эрэгийиэн кыттыаҕа
Ыам ыйын 21-27 күннэригэр Дьокуускайга “Эдэр профессионаллар” World Skills Арассыыйатааҕы VI национальнай чөмпүйэнээтин сүүмэрдиир күрэхтэһиитэ буолаары турар. Тустаах тэрээһин 2015 сылтан Саха сиригэр эмиэ ыытыллар. Олохтоох Үөрэх уонна наука министиэристибэтэ быйыл сүүмэрдиир күрэхтэһиини Дьокуускай куоракка тэрийэр туһунан сайаапканы World Skills Сойууһугар өссө былырыын атырдьах ыйыгар ыыппыта. Сойуус көрөн, 20 эрэгийиэни куонкурустаһыннаран баран Саха сирин талбыта.
Бу иннинэ Саха сирэ сүрүннээн өҥөнү оҥорууга сыһыаннаах компетенцияларга күрэхтэһиини тэрийэрэ. Быйыл буоллаҕына, IT идэлэргэ сыһыаннаах компетенциялары талбыт. Тоҕото биллэр. Өҥө оҥоруу компетенцияларыгар Саха сирэ кэккэ ситиһиилэрдээх. Онон аныгы кэмҥэ олоххо балай да ирдэнэн эрэр IT, бырамыысыланнас идэлэрин өрөспүүбүлүкэҕэ сайыннарар, маныаха үрдүк таһымнаах исписэлиистэри иитэн таһаарар инниттэн ити хайысханы күүскэ баһылыыр соруктаахтар. Оҕо оҕоттон үөрэнэрэ, иҥэринэрэ үгүс. Дойду күүстээхтэрин, бастыҥнарын уопутун миэстэтигэр тутан олорон бэйэбит оҕолорбутугар, устудьуоннарбытыгар көрдөрөр туох куһаҕаннаах буолуой. Саха сирин сэргэ сүүмэрдиир күрэхтэһиилэр Москваҕа, Чувашия, Хотугу Осетия, Татарстан өрөспүүбүлүкэлэригэр, Ханты-Мансийскай автономнай уокурукка, Москва, Ростовскай, Свердловскай уобаластарга, Хабаровскай, Красноярскай кыраайдарга, о.д.а. тус-туспа хайысхаларынан барыаҕа.
Күрэхтэһиигэ дойду 57 эрэгийиэниттэн 300-тэн тахса киһи “веб-дизайн уонна разработка”, “бырамыысыланнас автоматиката”, “ювелир дыалата”, “сетевой уонна системнай администрирование”, “реверсивнэй инжиниринг”, “геодезия” компетенцияларга ким бастыҥын быһаарыахтара. Тэрээһин П.И.Дудкин аатынан Дьокуускайдааҕы сибээс уонна энергетикэ кэллиэһигэр буолуоҕа. Ким баҕалаах барыта кэлэн көрүөн сөп, киириитэ босхо. Төһө кыалларынан элбэх дьону хабар инниттэн күрэхтэһии арыллыытын ыам ыйын 22 күнүгэр Ленин болуоссатыгар тэрийиэхтэрэ.
Людмила ПОПОВА, “Саха сирэ” хаһыат, edersaas.ru
Хаартыска интэриниэттэн.