Айсен Николаев «WorldSkillsRussia — 2020» кыайыылаахтарын эҕэрдэлээтэ

— Өрөспүүбүлүкэбит олох дохсун хардыытыттан, тэтимиттэн хаалсыбакка сайдан иһэрин эһиги ситиһиигит туоһулуур. Маныаха үлэ саҥа көрүҥнэрэ үөрүйэх буолбут идэлэри түргэнник үтэйэн, туоратан иһэллэрэ бу аныгы кэм ирдэбилэ буоларын өйдүүбүт. Ол эрээри, ханнык баҕарар дьыалаҕа, дьарыкка ситиһии дириҥ өйүнэн, билиинэн-көрүүнэн, айымньылаах сыһыанынан быһаарыллар», — диэтэ Ил Дархан.

Түмсүүлээх хамаанда кыһамньытынан,  бэлэмнэнии сыратынан, Саха сирэ быйылгы күөн күрэскэ 25-тэн тохсуска таҕыста, 24 бириистээх миэстэни ыллылар. Түмүккэ «Сыл прогреһа» анал аат кыайыылааҕынан тахсан, Арассыыйа ТОП-10 бастыҥ эрэгийиэннэрин кэккэлэригэр киирдилэр.

«Кыайыылаахтар уонна призердар ортолоругар араас оскуолалартан уонна кэллиэстэртэн бааллара үөрдэр. Кэлэр өртүгэр кыттааччылар георгафиялара өссө кэҥээн иһэригэр баҕарабын. Дьоҕурдаах оҕолор өрөспүүбүлүкэбит бары муннуктарыгар баалларыгар эрэнэбин», — диэтэ Ил Дархан. Чөмпүйэнээт бары кыайыылаахтарыгар уонна настаабынньыктарыгар махтал суруктары ыытта.

Көрсүһүү модератора, СӨ Үөрэх уонна наука миниистирэ Михаил Сивцев, Саха сирэ WorldSkills Russia хамсааһыҥҥа 2013 сыллаахха киирбитин, өрөспүүбүлүкэ аан бастаан эрэгийиэн түһүмэҕэр алта компетенциянан күрэхтэһиини ыыппытын сырдатта. 2019 сылга эрэгийиэн түһүмэҕэр 127 компетенцияҕа тиэрдиллибит.

«Бу компетенциятын уонна кыттааччытын ахсаанынан өрөспүүбүлүкэҕэ ыытыллыбыт чөмпүйэнээт саамай улахан, далааһыннаах тэрээһинэ этэ. Кыттааччытын уопсай ахсаана  — 1836, итинтэн 1036 куонкурустаһааччы, 800 эспиэр», — диир Михаил Сивцев.

Быйыл «Эдэр профессионаллар» (WorldSkills Russia) — 2020″ күөн күрэс түмүгэ балаҕан ыйын 6—20 күннэригэр куйаар ситиминэн буолла. Манна дойду 83 эрэгийиэниттэн 2800 киһи кытынна. Саха сирин сүүмэрдэммит хамаандата  74 компетенциянан, итинтэн 42 кыттааччы — эдэр профессионалларга, 32 — юниордарга кытынна.

«Эдэр профессионаллар» (WorldSkillsRussia) – 2020 чөмпүйэнээт кыайыылаахтарын аатыттан Геодезия» компетенция кыһыл көмүс медалиһа, хайа-геологическай тиэхиньикум выпускнига Павел Спиридонов уонна Дьокуускайдааҕы «Оҕо (подростковай) киинин» иитиллээччитэ, «Администрирование отеля» компетенцияҕа боруонса мэтээллээх Светлана Булатова хайдах бэлэмнэммиттэрин, кыттыбыттарын сырдаттылар, инникитин даҕаны билиилэрин-көрүүлэрин сайыннарарга баҕалаахтарын биллэрдилэр.

Настаабынньыктар ааттарыттан Любовь Ивановна Дорогунова (Дьокуускайдааҕы промышленнай тиэхиньикум преподавателэ, ювелирнай дьыала эспиэрэ) хаачыстыбалаах бэлэмнэнии кыайыыга тирэх буолбутун эттэ.