Быйылгы чөмпүйэнээккэ «эдэр профессионаллар» 55 компетенциянан, «юниордар» категорияҕа 54 компетенциянан, ону сэргэ, саҥа категорияҕа «50+ муударайдар үөрүйэхтэрэ» үс компетенциянан ыытылынна. Чөмпүйэнээккэ уопсайа 1000 киһи кыттыбыта бэлиэтэнэр.
Чөмпүйэнээт ситиһиилээхтик түмүктэммитинэн бары кыттыылаахтары, эспиэрдэри уонна настаабынньыктары СӨ бырабыыталыстыбатын бэрэссэдээтэлэ Владимир Солодов эҕэрдэлээтэ уонна «WorldSkills Russia» эрэгийэннээҕи чөмпүйэнээт» киэҥ далааһыннаахтык, өрө көтөҕүллүүлээхтик ааспытын бэлиэтээтэ. Күрэхтэһии 29 былаһаакканан 10 улууһунан ыытыллыбыт. Солодов эппитинэн, итинник тэрийии түмүгэр, компетенцияларынан өрөспүүбүлүкэ лидер буолбут.
«WorldSkills Russia Сахабыт сиригэр каадырдары бэлэмнииргэ далаһанан буолар. Санатан эттэххэ, СӨ Ил Дархана Айсен Николаев Анал этиитигэр өрөспүүбүлүкэ хас биирдии гражданина бэйэтин сайыннарарыгар кыаҕы биэрии сүрүн сыал-сорук буоларын бэлиэтээбитэ. Каадырдары бэлэмнээһин, компетенциялары сайыннарыы — барыбыт сүрүн сыалбыт-сорукпут. WorldSkills кылаата сүҥкэн, — диэтэ Солодов.
Бу киэһээ компетенциялар бары кыайыылаахтара наҕараадаланнылар. Бырабыыталыстыба бэрэссэдээтэлэ «Информационнай уонна коммуникационнай технологиялар» хайысхалар кыайыылаахтарыгар мэтээл, куубак уонна диплом туттартаата.
«Компетенциялар элбэхтэр, онно информационнай технологиялар блоктара сүрүн. Саха сирэ Уһук Илиҥҥэ информационнай технологиялар сүрүннэрэ буолар баҕалаах. Ол иһин оҕолорбут ситиһиилэрин кыраҕытык кэтиибит. Маныаха уустук хайысхаларга оскуола үөрэнээччилэрэ кытары кытталлара уонна ситиһиилэнэллэрэ биһигини үөрдэр. Сорохторун мин хаһыс да көрүүм, кинилэр өссө атын күрэстэргэ кытары кытталлар. Бу оҕолор Саха сирин экономиката сайдарыгар, туруоруллубут сыалы-соругу толорорго сүрүн күүһүнэн буолалларыгар эрэнэбин», — диэтэ.
Владимир Солодов «50+ муударайдар үөрүйэхтэрэ» саҥа хайысханы бэлиэтээтэ. Кини эрэгийиэҥҥэ квалификацияны үрдэтиигэ, биэнсийэҕэ тахса илик дьону эбии үөрэтиигэ болҕомто уурулларын, сыал-сорук туруорулларын эттэ.
СИА «50+ муударайдар үөрүйэхтэрэ» хайысха биир кыайыылааҕа, Дьокуускайдааҕы индустриальна- педагогическай кэллиэс производственнай үөрэхтээһиҥҥэ маастара Яков Андреев эдэр исписэлиистэри кытары үлэ үөрүйэҕин, билиини-көрүүнү атастаһаары кыттыбытын эппит. «Биһиги бөлөхпүтүгэр тэрилтэлэртэн уонна кэллиэстэн уопсайа бэһиэ буолан кытынныбыт. Иһэрдэн, холбуу сиэтэн (сыбааркалаан) оҥорууга сорудах бэриллибитэ. Эппиэтинэстээх үлэ. Биэс чаас үлэлээтибит. Барытын ситэриэххэ-хоторуохха, үчүгэйдик оҥорорго сатабыллаах буолуохха наада. Мин, эдэрдэри бэйэбит билиибитигэр-көрүүбүтүгэр, сатабылбытыгар үөрэтиэхтээхпит, такайыахтаахпыт итиэннэ бэйэбит хайдах үлэлиирбитин көрдөрүөхтээхпит диэн саныыбын, — диэбит Яков Андреев.
Чөмпүйэнээт кыайыылаахтара федеральнай сүүмэрдиир чөмпүйэнээккэ баран кыттыахтаахтар. Ол түмүгүнэн Арассыыйа сүүмэрдиир хамаандата тэриллиэхтээх. Онно талыллыбыт сүүмэрдиир хамаанда Арассыйаҕа, Казань куоракка, ыам ыйыгар ыытыллар аан дойду чөмпүйэнээтигэр кыттыахтаах.
Андрей СОРОКИН (СИА) хаартыскаҕа түһэриилэрэ