Саха сирин историятыгар WorldSkills Kazan 2019 чөмпүйэнээтигэр аан дойду үрүҥ көмүс мэтээлин аан бастаан ХИФУ устудьуона аҕалла
Атырдьах ыйын 26 күнүгэр Казаҥҥа WorldSkills Kazan 2019 аан дойду 45-с чөмпүйэнээтин кэмигэр FutureSkills уонна WorldSkills Juniors норуоттар икки ардыларынааҕы былаһааккалар үлэлэрэ түмүктэннэ. WorldSkills International чэрчитинэн идэҕэ маастарыстыбаны көрдөрүүгэ Саха сирэ аан дойду таһымнаах куонкурустарга кыттыытыгар бастакы үрүҥ көмүс мэтээли Хотугулуу-Илиҥҥи федеральнай университет устудьуона Александр Тайшин ылары ситистэ.
ХИФУ хамаандата маннык компетенцияларга кытынна: “Синтез уонна минераллары чочуйуу”, “Цифровой модельер”, “Блокчейн-технологиялары кытта быһаарыыны торумнааһын”, “Реверсивнэй инжиниринг уонна квантовай технологиялар”. Күрэхтэһиилэр түмүктэринэн идэ маастарыстыбатыгар Саха сирэ аан дойду таһымнаах куонкурустарга кыттыытыгар историяҕа бастакы үрүҥ көмүс мэтээли WorldSkills International (Future Skills) чэрчитинэн “Синтез уонна матырыйааллары чочуйуу” компетенцияҕа ХИФУ устудьуона Александр Тайшин ылары ситистэ. Кини ылбыт баалынан Бельгия уонна АХШ бэрэстэбиитэллэрин кэннигэр хаалларда. Александр Тайшин настаабынньыгынан РФ национальнай сүүмэрдэммит хамаандатын “Оҥорон таһаарыыга хамаанданан үлэ” уонна “Синтез уонна матырыйааллары чочуйуу” компетенцияларга тириэньэр Роман Гоголев буолла. Эксперинэн норуоттар икки ардыларынааҕы эксперт Ким Хенсок буолар.
“Мин олунньу ыйга Роман Гоголев ыыппыт сүүмэрдээһинин талбытым, ол кэнниттэн Саха сирин сүүмэрдэммит хамаандатын састаабыгар “Эдэр профессионаллар” (WorldSkills Russia) сэттис национальнай финалыгар кыттыбытым. Үгүс матырыйаалы электротиэхиньикэҕэ, технологическай процесстарга, матырыйаал тиэмэтигэр уонна минераллары чочуйууга уурбутум”, — диир Александр Тайшин.
“Саха сиригэр электротиэхиньикэҕэ миигин FutureSkills:NEFU кэскиллээх компетенцияларыгар Сайдыы норуоттар икки ардыларынааҕы киинигэр бэлэмнээбиттэрэ. Онтон үөрэтэр-сүүмэрдиир эрчиллиилэр буолбуттара. Бириистээх миэстэҕэ тиксэр туһугар дьулуспутум. Үбүлээбит дьоммор, тириэньэрбэр Роман Гоголевка, Арассыыйа сүүмэрдэммит хамаандатын тириэньэрдэрин штабыгар махтанабын.
Роман Гоголев этэринэн, Уһук Илин федеральнай уокуругар уонна аан дойдуга даҕаны кэлэр кэм компетенцияларыгар инники күөҥҥэ тахсар кыахтаахпыт. “Абу-Даби чөмпүйэнээтигэр саха норуотуттан биир бэрэстэбиитэл кытынна, онон биһиги хайтек блогар уонна кэскиллээх компетенцияларга киирдибит. Бу сайдыыны туоһулуур, — диэтэ Роман Гоголев.—Аны болҕомтобутун Шанхайга туһаайабыт. Бу Азия уонна Арассыыйаҕа олус суолталаах киирсии, — диэн кини бэлиэтээтэ.
Евгений Онуфириев, ХИФУ медиатын корпоративнай эрэдээксийэтэ.