Соторутааҕыта Томпо улууһун Хаандыга бөһүөлэгэр WorldSkills эрэгийиэннээҕи күрэхтэһиигэ оҕолор бульдозеры ыытарга уонна геодезияҕа күрэхтэстилэр. Бу иннигэр Хаандыгатааҕы Хайа-геология тиэхиньикумун бүтэрбит Денис Черноградскай уонна Андрей Чаприн Казань куоракка WorldSkills Russia национальнай финалыгар геодезияҕа 4-с миэстэни ылан, “Идэҕэ сатабыл” бэлиэнэн наҕараадаламмыттара. Арассыыйа үрдүнэн сүүмэрдэнэн, бастыҥтан бастыҥнар кэккэлэригэр киирбиттэрэ.
edersaas.ru
Чаприн диэн дьикти араспаанньалаах уол Үөһээ Бүлүүттэн төрүттээх, тиэхиньикуму 2019 сыллаахха бүтэрбитэ. Андрей билигин «Аэропорты Севера» тэрилтэҕэ сүрүннүүр инженер-геодезист. Хаандыгаҕа WordSkills эспиэрин быһыытынан күрэхтэһээччилэр үлэлэрин сыаналыы кэлбит.
— «WorldSkills Russia» миэстэлэспитим үлэҕэ киирэрбэр көмөлөстө. Үксүн командировкаҕа сылдьан, геодезическэй устуу оҥоробун. Сөмөлүөт түһэр-тахсар балаһата тэҥ буоларын туһугар эппиэттиибин. Балаһа туругун кэтээн көрөбүт. Үлэбин сөбүлүүбүн, салгыы ХИФУ-га тутуу үөрэҕэр киириэхпин баҕарабын. Инникитин аэропортары саҥардарга, тутарга үлэлэһиэм, —диэн кэпсиир кини.
«Полиметалл» хампаанньа спутниковай сибээстээх аныгы геодезическэй тэрили атыылаһарга кыттыгас үбүлээн, устудьуоннар быйылгыттан онно дьарыктанан, WorldSkills бэлэмнэнэллэригэр таһымнарын үрдэтиэхтэрэ.
Марианна Тыртыкова, «Саха сирэ», edersaas.ru