Выпускниктар 50 сыллаах үбүлүөйдэригэр дьоһун бэлэх оҥордулар

Быйыл Саха АССР төрүттэммитэ 100 уонна оскуоланы бүтэрбиттэрэ 50 сылынан Уус Маайа улууһун Күп орто оскуолатын выпускницата А. Р. Винокурова бу күннэргэ бэртээхэй кинигэни бэчээккэ бэлэмнээн таһаартарда.

Анна Романовна өр кэмҥэ СӨ үп  министерствотыгар үрдүк таьаарыылаахтык үлэлээн баран бочуоттаах сынньалаҥҥа, Москваҕа сиэнин көрөн олорор.

Дойдутуттан ыраах да сырыттар, бииргэ үөрэммит оҕолорун, оскуола урукку директорын, 88 саастаах М. В. Атласованы кытары кэпсэтэн, барыларын көҕүлээн, ахтыыларын хомуйан, бэчээттээн кинигэ таһаардылар. Анна Романовнаҕа балта Дарья Романовна көмөлөһөн, куоракка типографияны кэпсэтэн, бэртээхэй кинигэ күн сирин көрдө. Ю. А. Гагарин аатынан типографияҕа бэчээттэннэ. Онон икки улахан үбүлүөйдээх сылга эдьийдии балыстыы Анна, Дарья Винокуровалар үөрэммит оскуолаларыгар бэртээхэй бэлэҕи оҥордулар. 50 сыл анараа өттүгэр Күп национальнай орто оскуолатын выпускниктара 50 сыллаах үбүлүөйдэринэн буолан ааспыт кэм үтүө түгэнин үйэтиттилэр.

Марта Николаева