Уопсастыба

«Үрүҥ көмүс выпуск истипиэндьийэтэ» — норуот бириэмийэтэ

Нам орто оскуолатын 1990 сыллаахха бүтэрээччилэр улуус үөрэҕириитин устуоруйатыгар биир умнуллубат бэлиэ «чаҕылхай сулус» выпустарынан буолаллар.  

edersaas.ru

Ол сыл оскуоланы биэс выпустан 11 үөрэнээччи үрүҥ көмүс мэтээлинэн бүтэрбиппит. Билигин ол оҕолор ортолоругар Ил Түмэн дьокутаата, педагогическай уонна медицинскэй наука хандьыдааттара, норуот хаһаайыстыбатын бары салааларын исписэлиистэрэ бааллар. Үгүс кылааһынньыктарбыт омук сирдэригэр олохсуйан олороллор. Бары тапталлаах оскуолабытын олус күндүтүк саныыбыт.

 

2005 сылтан ол сыллааҕы выпускниктар түмсэн, оскуоланы бүтэрбиппит 15 сылыгар «Үрүҥ көмүс выпуск истипиэндьийэтэ” диэн үчүгэй үөрэхтээх, олоххо көхтөөх үөрэнээччигэ харчынан бириэмийэни олохтообуппут. Быйыл ол үтүө дьыала 15-с үбүлүөйдээх сыла.

 

Сыстыганнаах дьаҥ өрө турбутунан, «Тиһэх чуораан» бырааһынньыга  дьиэҕэ олоруу эрэсиимэ олохтоммутунан сибээстээн, көһөн биэрэн, бэс ыйын бүтүүтүгэр бэлиэтэнэрэ былааннанар. Бу бэлиэ тэрээһиҥҥэ биһиги эмиэ эрдэттэн кыттыһан, оскуоланы бүтэрбиппит 30 сылынан, эһиил, 2021 сылга, Нам улууһугар үөрэҕирии тэриллибитэ 150 сылын көрсө үбүлүөйдээх истипиэндьийэбитин быйыл 11 «б» кылааһы  кыһыл көмүс мэтээлинэн бүтэрээри сылдьар  Лида Новгородоваҕа туттарарга быһаардыбыт.

 

Түгэнинэн туһанан, бу үтүө дьыалаҕа кыттыспыт үөлээннээхтэрбэр — 1990 сыллаах выпускниктарга дириҥ махталбын тиэрдэбин.

 

Уустук кэм түбүгүн быыһыгар ыҥырыыбар кыттыһан,  15 сыл устата сүрэхтэрин баҕатынан, үөрэ-көтө, долгуйа, ким төһө кыахтааҕынан үбүнэн көмөлөрүн утары ууналларыгар. Күндү кылааһынньыктарым, эһиэхэ чэгиэн доруобуйаны, дьиэ кэргэҥҥитигэр дьолу-соргуну, үлэҕитигэр ситиһиини баҕарабын.

 

2018 сыллаахха  Нам улууһун дьахтар сүбэтин бэрэссэдээтэлинэн талыллыбытым. Үгүс тэрээһини тэҥэ  дьүөгэлэрбин кытта уопсастыбаннай олох биир көрүҥүн быһыытынан истипиэндьийэ олохтообуппут. Онон кылааһынньыктарым  үтүө хамсааһыннарыгар кыттыһан, быйылгы истипиэндьийэбитин 11 «в» кылааһы бүтэрээри сылдьар Алсу Романоваҕа аныахпыт.

 

Үтүө холобур батыһыннарыылаах буолар. Хаалыктаах  хаамыы “Хардыы” түмсүүтүн чилиэнэ буоларым быһыытынан дьүөгэлэрбэр   “Үрүҥ көмүс истипиэндьийэ” диэн бэртээхэй хамсааһын баарын туһунан кэпсээбиппэр, дьонум олус сэҥээрбиттэрэ. Онон быйыл оскуоланы бүтэрэр бастыҥ үөрэнээччилэргэ өссө биир суолталаах бириэмийэ — “Хардыы» түмсүүтүн истипиэндьийэтэ баар буолла. Бу бэлэхпитин биһиги Ленскэй нэһилиэгин 3-с №-дээх оскуолатын бүтэрээччилэргэ, успуорка үрдүк ситиһиилээх үс эдэр киһиэхэ: И.С. Гаврильев аатынан Нам 1 №-дээх нүөмэрдээх орто оскуолатын бүтэрэр Тимур Колесовка, Нам 2 №-дээх нүөмэрдээх орто оскуолатын бүтэрэр Сеня Гоголевка, И.С. Охлопков аатынан Намнааҕы гимназия аттестатын ылар Артур  Бурнашевка анаатыбыт. Бу истипиэндьийэлэри бэс ыйын бүтүүтүгэр буолуохтаах Выпускниктар  биэчэрдэригэр үөрүүлээх быһыыга-майгыга туттарыахтара.


Ити курдук, «Үрүҥ көмүс выпуск истипиэндьийэтэ» норуот бириэмийэтэ буолан, миигин тулалыыр күндү дьонум үтүө холобурдара биир дойдулаахтарбыт биһирэбиллэрин ылан, киэҥник тарҕанан, үрдүк далааһыннанан иһэригэр эрэнэн туран, биһиги хамсааһыммытыгар кыттыһалларыгар ыҥырабын. 

«Саха сирэ» хаһыакка, edersaas.ru саайтка анаан Ирина НАХОДКИНА,

1990 сыллаахха 1 №-дээх Нам орто оскуолатын үрүҥ көмүс мэтээлинэн бүтэрээччи,

Нам улууһун дьахталларын сэбиэтин бэрэссэдээтэлэ,

хаалыктаах  хаамыы “Хардыы” түмсүүтүн чилиэнэ,

социальнай педагог,

оскуоланы бүтэрэр бастыҥ үөрэнээччилэри чиэстиир

«Үрүҥ көмүс выпуск истипиэндьийэтэ» хамсааһыны көҕүлээччи.

2
0
Telegram @edersaas20

Добавить комментарий