Вячеслав Володин: бүддьүөт харчыта сыл саҕаланыытыттан тута үлэлээн барыахтаах
Судаарыстыбаннай Дуума бэрэссэдээтэлэ Вячеслав Володин мунньахха иһитиннэрбитинэн, эһиилги сыллаах федеральнай бүддьүөт сокуонун барылын иккис ааҕыытыгар быйыл үбүлээһин 98 % эрэгийиэннэринэн тыырылынна.
Санатан эттэххэ, Арассыыйа 2022 сыллаах бүддьүөтүн барылынан дохуота – 25,02, ороскуота – 23,69 трлн солкуобайга тэҥнэһиэҕэ.
“Дойдубут эһиилги сыллаах бүддьүөтүн сокуона профициттаах былааннанна. Ити эбии харчыны нэһилиэнньэҕэ социальнай көмө быһыытынан, ордук дьиэ кэргэни өйүүргэ туһуланыаҕа”, – диэн бэлиэтиир кини.
Кэлиҥҥи сылларга эрэгийиэннэр бүддьүөттэрин тэҥнээһин туһунан РФ бырабыыталыстыбатыгар да, парламеҥҥа да элбэхтэ кэпсэтиилэр ыытыллаллар. Вячеслав Володин Судаарыстыбаннай Дуума мунньаҕын кэмигэр иһитиннэрбитинэн, эрэгийиэннэр бүддьүөттэрин тэҥнээһин эрдэттэн ыытыллыахтаах.
– Бу тэҥнээһин өскүөрүтүн эрэ буолбакка, субъектар сайдыыларыгар туһуланыахтаах. Оччотугар кинилэр бэйэлэрин боломуочуйаларын толору туһаналларыгар, социальнай боппуруостарын быһааралларыгар, ол иһигэр оскуола, оҕо саадын, балыыһа, суол-иис тутууларын ыыталларыгар, сөптөөх үптээх буолуох этилэр. Эһиил федерация бүддьүөтүттэн эрэгийиэннэргэ дотация быһыытынан 758,5 млрд солкуобай барыаҕа. Оттон бүддьүөттэр икки ардыларынааҕы трансферт быһыытынан барыта 3,2 трлн солкуобай ороскуоттаныаҕа. Манна даҕатан эттэххэ, 4-5 сыллааҕыта бүддьүөт сокуонун барылын иккис ааҕыытыгар бүддьүөттэр икки ардыларынааҕы үбүлээһин 65 % эрэ тыырыллар буоллаҕына, быйыл 98 % эрэгийиэннэринэн тыырылынна. Ити эрэгийиэннэр бэйэлэрин бүддьүөттэрин сокуонугар федеральнай үбүлээһини ааҕыналларыгар, федеральнай биэдэмистибэлэри кытары түргэнник дуогабар түһэрсэллэригэр уонна, саамай сүрүнэ, бүддьүөт харчыта сыл саҕаланыытыттан тута үлэлээн барарыгар көмөлөөх, – диэн бэлиэтиир бэрэссэдээтэл.
Аграфена КУЗЬМИНА