Вячеслав Степанов – саха спортивнай суруналыыстыкатыгар тугунан даҕаны кэмнэммэт сүдү кылааты киллэрбит, бэйэтин идэтин чахчы баһылаабыт, айылҕаттан талааннаах киһи быһыытынан сыаналанар. Кини өрөспүүбүлүкэ бастыҥ суруналыыһын, элбэх кинигэ ааптарын, тэлэбиидэнньэнэн уонна араадьыйанан биэриилэр ыытааччыларын быһыытынан киэҥ биһирэбилинэн туһанара. Суруйууларын, эбэтэр араадьыйаҕа кэпсээнин истэ олорон, хайдах эрэ буола турар түгэни бэйэҥ хараххар ойуулаан көрөр курдугуҥ уонна ол эйгэҕэ киирэн хааларыҥ. Оннук ылыннарыылаахтык, киһини угуйардыы кэпсиирэ, суруйара…
Петр ПАВЛОВ, “Саха сирэ”, https://edersaas.ru/
Талааннаах спортивнай суруналыыс уонна комментатор Вячеслав Гаврилович Степанов баара эбитэ буоллар, кулун тутар 7 күнүгэр лоп курдук 70 сааһын үөрүүлээхтик бэлиэтиэ этэ. Саха сирэ кини аатын умнубат. Өрөспүүбүлүкэ самбоҕа чөмпүйэнээтэ Вячеслав Степанов кэриэһигэр ыытыллар буолбута үгэскэ кубулуйда. Быйылгы чөмпүйэнээт Валерий Керемясов аатынан Дьокуускайдааҕы оҕо спортивнай оскуолатын тустууга саалатыгар ыытылынна. Түһүлгэҕэ 9 хамаандаттан, ол иһигэр Монголияттан барыта 110 спортсмен тахсан күөн көрүстэ.
Чөмпүйэнээти үөрүүлээхтик аһыыга СӨ спорка миниистирин солбуйааччы Марина Захарова, өрөспүүбүлүкэ самбоҕа федерациятын бэрэсидьиэнэ Олег Тарасов, Вячеслав Гаврилович доҕоро, милиция подполковнига Анатолий Генеров, кэргэнэ Анна Николаевна, чөмпүйэнээт кылаабынай судьуйата Валерий Герасимов – В.Г.Степанов туһунан кылгас ахтыы оҥордулар, спортсменнарга ситиһиини баҕардылар.
Дьэ ол кэнниттэн икки көбүөрүнэн сытыы киирсиилэр салҕанан ыытылыннылар. Быйылгы түһүлгэҕэ Ньурба, Нам, Мэҥэ Хаҥалас, Хаҥалас, Дьокуускай спортсменнарын тэҥэ самбонан идэтийэн дьарыктанар кулууптар уонна Монголия самбистара көхтөөхтүк кытыннылар. Ол курдук, монголлар икки кыһыл көмүс, биир үрүҥ көмүс мэтээллэннилэр.
52 киилэҕэ монгол Тэмучин Гамбургет – Максим Федоровы үөһэттэн быраҕаттаан түһэрэн хапсыһыыны болдьоҕун иннинэ очукуонан (10:0) ыраас кыайыыны ситистэ. Салгыы ыйааһын финалыгар эмиэ монгол Ганхуяг уонна “Сакура” кулууптан Гаврил Семенов таҕыстылар. Бу да киирсии уһаабата. Россия чөмпүйэнээтин боруонса призера, Уһук Илин федеральнай уокурук чөмпүйүөнэ, спорт маастара Гаврил Семенов сытыытык кииртэлээн, албастары бииртэн биир сатабыллаахтык туттан, хапсыһыыны эмиэ болдьоҕун иннинэ бэйэтин туһатыгар түмүктээтэ. Күрэхтэһии кылаабынай судьуйата уонна комментатора Валерий Герасимов эппитинэн, Гаврил Семенов билигин Р.М.Дмитриев аатынан Олимпийскай эрэл училищетыгар тренеринэн үлэлиир эбит.
68 киилэҕэ Анушар Хаттабов (“Самони”) уонна Никита Иванов (“Славутич”) бастакы миэстэ иһин киирсиилэрэ утуу-субуу хардарыта бырахсыылаах буолла. Түмүккэ 10:7 ахсаанынан кыайыыны Хаттабов ситистэ. Ол гынан баран, Иванов тренердэрэ уонна ыалдьааччылара судьуйа үлэтин астыммакка, мөккүөрү тарда сатаатылар.
Билэргит курдук, бу иннинэ аҕай, өрөбүл күннэргэ “Славутич” спортивнай кулууп дзюдоҕа аһаҕас турнира ыытыллыбыта. Онно Хабаровскай, Забайкальскай кыраайдар, Амурскай уобалас, Бурятия, Монголия, Саха сирин спортсменнара күөн көрсүбүттэрэ. Ити күрэхтэһии муҥутуур кыайыылааҕынан, биэс утарсааччытыгар хотторуу хомолтотун биллэрбит 18 саастаах Евгений Литавин буолбута. Кини нөҥүө күнүгэр аны самбоҕа өрөспүүбүлүкэ чөмпүйэнээтин финалыгар тахсыбыта. Дьэ, биһиги үчүгэй киирсиини көрөөрү чөрбөс гына түстүбүт. Ол эрээри, хыпсыһыы уһаабата, баара эрэ 14 сөкүүндэнэн кыайыыны Артем Забегин (“Славутич”) ситистэ. Биһиги өйдөөмүнэ да хааллыбыт…
Түмүккэ бэйэлэрин ыйааһыннарыгар кыайыылаахтарынан буоллулар: 48 кг – Карина Ефимова (ДЮСШ-2), 52 кг – Мерлан Кызы (“Кайрат”), 56 кг – Цыденжав (Монголия), 60 кг – Виолетта Павлова (“Гэлакси”), 68 кг – Анастасия Бочкарева (“Кайрат”), 52 кг – Тэмучин Гамбургет (Монголия), 57 кг – Гаврил Семенов (“Сакура”), 62 кг – Александр Тимофеев (ХИФУ), 68 кг – Анушар Хаттабов (“Самони”), 74 кг – Точидин Замонов (ДЮСШ-2), 82 кг – Артем Забегин (“Славутич”), 90 кг – Илья Громов (“Славутич”), 90-тан үөһэ кг – Азиз Маммадов (Алдан).
Чөмпүйэнээт түмүгүнэн Ануш Хаттабов, Илья Громов, Виолетта Павлова, Мерлан Кызы – Спорт министиэристибэтин анал бириистэринэн наҕараадаланнылар. Оттон Гаврил Семенов, спортивнай суруналыыстар анал бириистэрин хаһаайынынан буолла.
Чөмпүйэнээт кэнниттэн кылаабынай судьуйа Валерий Герасимовтан санаатын үллэстэригэр көрдөстүбүт: “Вячеслав Гаврилович кэриэһигэр өрөспүүбүлүкэ самбоҕа чөмпүйэнээтэ 17-с сылын ыытыллар. Бу улахан эппиэттээх күрэхтэһии. Манна ситиһиилээхтик кыттыбыттар, самбоҕа маастарга хандьыдаат нуорматын толороллор. Инникитин бу чөмпүйэнээт таһымын өссө үрдэтэн, спорт маастара нуормата толоруулаах гына оҥорорго дьулуһабыт.
Бу күрэхтэһии түмүгүнэн Улан-Удэ куоракка ыытыллар Россия Азиятааҕы зонатын чөмпүйэнээтигэр кыттар Саха сирин хамаандатын састааба сүүмэрдэннэ. Тус санаабар, бастыҥ самбиһынан Россия чөмпүйэнээтин 2016 сыллааҕы боруонса призера Гаврил Семеновы ааттыам этэ”, — диэтэ.
Петр ПАВЛОВ, “Саха сирэ”, https://edersaas.ru/
Ааптар хаартыскаҕа түһэриитэ.