Вячеслав Штыров: «Саха Өрөспүүбүлүкэтин күнүнэн эҕэрдэлиибин!»
Күндү Саха сирин олохтоохторо!
Өрөспүүблүкэ историята – бу бигэ сайдыы историята. Сүүс сыл анараа өттүгэр саха чулуу уолаттара Алексей Кулаковскай, Василий Никифоров, Гавриил Ксенофонтов, Максим Аммосов, Платон Ойуунускай, Степан Аржаков, Исидор Барахов уо.д.а. саҥа Саха Автономнай Сэбиэскэй Социалистическай Өрөспүүбүлүкэтин олохтообуттара. Саха сиригэр биир дьиэ кэргэн курдук иллээхтик олорор норуоттарга барҕара сайдыы аартыгын арыйбыттара. Ол түмүгүн биһиги билигин арылхайдык көрөбүт-истэбит.
Биһиги өрөспүүбүлүкэбит экономика, бырамыысыланнас, социальнай хайысха, наука, үөрэхтээһин, доруобуйа харыстабылын, култуура уонна ускуустуба эйгэлэригэр дьоһуннаахай ситиһиилэринэн киэн туттабыт. Биһиги бары төрөөбүт Сахабыт сирэ чэчирии сайдарын туһугар үлэлиибит-хамсыыбыт.
Кэм-кэрдии биир сиргэ хараҕаламмат, иннибитигэр бырамыысыланнаһы, саҥа технологиялары сайыннарыы, норуот хаһаайыстыбатын үгэс буолбут салааларын бөҕөргөтүү саҥа соруктара тураллар. Ону биһиги ситиһиэхпит диэн эрэнэбин. Тоҕо диэтэххэ, таһаарыылаах үлэ тула түмсүү, омуктар икки ардыларыгар иллээх-эйэлээх, хардарыта ытыктаһыы, бииргэ сомоҕолоһуу эйгэтэ Саха сирин олохтоохторун ураты хаачыстыбалара буолар.
Күндү Сахам сирин олохтоохторо! Саха Өрөспүүбүлүкэтин күнүнэн ис сүрэхпиттэн итиитик-истиҥник эҕэрдэлиибин! Бу күн саҥа ситиһиилэр саҕаланар кирбиилэрэ буолуохтун! Барыгытыгар чэгиэн-чэбдик доруобуйаны, этэҥҥэ буолууну, үлэҕитигэр-хамнаскытыгар ситиһиилэри баҕарабын!
Вячеслав Штыров, Саха Өрөспүүбүлүкэтин судаарыстыбаннай сүбэһитэ
«Саха сирэ», edersaas.ru