Бүлүү куоратыттан төрүттээх Дьокуускай куорат олохтооҕун, коммунальнай хаһаайыстыба үлэһитэ Вячеслав Попову бу күннэргэ Киин тэлэбиидэнньэ 1-кы ханаалын «Голос 60+» шоу-бырайыагар ыҥырдылар.
edersaas.ru
Вячеслав Попов — «Саха» НКИХ «Эн сулускун 50+» вокальнай ырыа куонкуруһун кыайыылааҕа, Гран-при хаһаайына. Бэйэтэ бэлиэтииринэн, хаһаак төрүттээх буолан, «ырыа» диэн баран муннукка ытаабыт киһи.
Вячеслав Попов Останкиноҕа ыытыллар бырайыакка хайдах кыттар буолбутун туһунан бу курдук кэпсиир:
— «Голос 60+» бырайыак усулуобуйатын уолум интэриниэттэн булан, сайаапка ыыппыта. Онно бэйэҥ тускунан ыспыраапканы, ханна үлэлииргин суруйаҕын, кыттыбыт куонкурустаргын ыйаҕын. Оҕом икки ырыабын, үс хаартыскабын ыыппыта. Мин ол сайаапканы ыыппыппытын умнан кээспитим. Арай бу күннэргэ уолум «каастиҥҥа ааспыккын» диэн соһутта. Арассыыйа бары эригийиэннэриттэн тыһыынчанан сайаапка киирбит. Ол элбэх ырыаһыттан миигин чорботон ыҥырбыттарыттан үөрэн сылдьабын.
Куонкурус хамыыһыйатыгар Вячеслав Попов сайаапкатыгар Фрэнк Синатра «Мой путь» уонна»Где же вы друзья, однополчане?» таптаан ыллыыр ырыаларын иһитиннэрэ ыыппыт.
— От ыйын 15 күнүгэр каастиҥҥа кытта барар буоллум. Онно аастахпына «слепой прослушивание» диэн түһүмэҕи ааһыахтаахпын, — диэн кэпсэтиибитин түмүктүүр ырыа куттаах сэһэргэһээччим.
Биир дойдулаахпытыгар Вячеслав Поповка каастины ситиһиилээхтик ааһан, Сахабыт сирин дорҕоонноохтук ааттатарыгар баҕарабыт!
Елена ПОТОЦКАЯ, «Саха сирэ» хаһыат, edersaas.ru
Хаартыска — yakutia-daily.ru