“Мой убийца” (режиссер Костас Марсан) киинэ сүрүн оруолун толорбут Вячеслав Лавернов “Дубль дв@” киинэ VIII онлайн-бэстибээлигэр “Актер бастыҥ үлэтэ” номинацияны ылла.
Людмила ПОПОВА, “Саха сирэ” хаһыат, edersaas.ru
Санатан эттэххэ, “Мой убийца” киинэ көрөөччү дьүүлүгэр былырыын тахсыбыта. Манна сүрүн оруолга Вячеслав Лавернов оонньообута. Силиэдэбэтэл оруолун толорбута.
“Дубль дв@” сэдэх бэстибээлинэн буолар. Куоластааһын интернет нөҥүө барбыта. Вячеслав элбэх куолаһы ылан, атыттары кэннигэр хаалларан, кыайыылаах аатын сүктэ. Быйыл куонкурус бырагырааматыгар 9 толору, 6 кылгас метражтаах хартыыналар, итиэннэ куонкуруһу таһынан икки испэктээк киирбитэ.
—“Сарсын бэстиибээл үөрүүлээх сабыллыытыгар кэлэҕин» диэбиттэригэр соһуйан эрэ хаалбытым. Түргэн үлүгэрдик Москваҕа көтөн кэлэн бу бириэмийэбин ыллым уонна Дьокуускайга төттөрү көтөөрү олоробун. Биллэр-көстөр артыыстары кытта күрэхтэһиигэ миигин ойуччу туппуттара, үлэбин сыаналаабыттара улахан үөрүүлээх.
Номинацияҕа балачча элбэх киһи киирсибитэ. Биллэр-көстөр артыыстартан Виктор Сухоруков, Светлана Ходченкова уо.д.а. бааллара. Куоластааһын интернет нөҥүө барбыта. Биир дойдулаахтарым, Сахам дьоно-сэргэтэ миэхэ “ыалдьан” кыайыылаах таҕыстым. Уопсайа 400-тэн тахса куолас киирбит этэ.
Бу миэхэ иккис номинациям буолар. Ол курдук, ый анараа өттүгэр Ханты-Мансийскайга ыытыллыбыт “Дух огня” диэн киинэ бэстибээлигэр Александр Абдулов аатынан “Эр киһи бастыҥ оруола” диэн номинацияҕа тиксэн турабын.
Миэхэ куоластаабыт бар дьоммор бука барыгытыгар, “Art-doydu” компанияҕа, продюсербытыгар Марианна Скрыбыкинаҕа, режиссербутугар Костас Марсаҥҥа, Сахам тыйаатырын үлэһиттэригэр, учууталларбар, чугас дьоммор, аймахтарбар махталбын тиэрдэбин. Кинилэр өйөөннөр, көмөлөһөннөр, такайаннар, мин маннык бириэмийэлэргэ тиксэр дьолу биллим.
Инники былааннарбын үллэһиннэхпинэ, туох да диэбит иһин, тыйаатыр артыыһабын. Сүрүн үлэм — ол. Онон тыйаатырбын инники күөҥҥэ тутабын”, — диэн Вячеслав төлөпүөнүнэн үөрүүтүн үллэһиннэ.
Толору метражтаах көрөөччүлэр биһирэбиллэрин “Монах и бес” (режиссер Николас Досталь), кылгаска — “Ближе, чем кажется” (режиссер Наталия Беляускене) киинэлэр ыллылар. Онтон Быйылгы “Дубль дв@” Гран-при хаһаайынынан “Поездка к матери” (режиссер Михаил Косырев-Нестерев) буолла.
Дьүүллүүр сүбэҕэ режиссер Александр Митта (бэрэссэдээтэл), Оксана Карас, Александр Котт, Юлия Ауг үлэлээтилэр.
Эдэр артыыска, Вячеслав Лаверновка үлэтигэр өссө үрдүк ситиһиилэри!
Людмила ПОПОВА, “Саха сирэ” хаһыат, edersaas.ru