Бэлиитикэ Маны аах

Вячеслав Емельянов: Арктика сайдыытыгар атомнай ыстаансыйа төһүү буолуоҕа

СӨ коммунальнай хаһаайыстыбатын уонна энергетикатын миниистирэ Вячеслав Емельянов иһитиннэрэринэн, атомнай ыстаансыйалары тутуу туһунан кэпсэтии 2018 сылтан ыытыллар, бу бырайыактар хотугу улуустар, Арктика сайдыытыгар төһүү күүс буолуохтаахтар.

Саха сирэ 2018 сылтан саҕалаан “Росатом” корпорацияны кытары кыра кыамталаах атомнай ыстаансыйалары кытары үлэлэһэр.

Бу курдук улахан бырайыактар хотугу улуустарбыт сайдыыларыгар, социальнай инфраструктураларын тупсарыыга төһүү буолуох этилэр. Ыстаансыйа олоххо киирдэҕинэ Арктика улуустарыгар, бастатан туран, уот күүһүрүөҕэ. Үчүгэй инженернэй тутуу баар буоллаҕына бырамыысаланнас да сайдан барыаҕа. Ити кэнэҕискитин саҥа үлэ миэстэтин таһаарыыга, нэһиилэнньэ олоҕо тупсарыгар көдьүүстээх буолуоҕа, – диэн бэлиэтиир Вячеслав Павлович.

Санатан эттэххэ, Илиҥҥи экономическэй форумҥа Ил Дархан Айсен Николаев Уһук Илин, Арктика сайдыыларын миниистирэ Алексей Чекункову, “Росатом” судаарыстыбаннай корпорация генеральнай дириэктэрин Алексей Лихачеву кытары Саха сиригэр кыра кыамталаах атомнай ыстаансыйалары тутарга дуогабар түһэрсибиттэрэ. Дуогабар чэрчитинэн Усуйаана улууһугар кыра кыамталаах атомнай ыстаансыйа тутуллуохтаах.

Аграфена КУЗЬМИНА

0
0
Telegram @edersaas20