От ыйын 29 күнүнээҕи туругунан, өрөспүүбүлүкэ үрдүнэн тоҕус сиргэ турбут ойуур баһаара бохсуллубут, аны 25 сиргэ: ол иһигэр Сунтаар, Хаҥалас, Ньурба, Уус Алдан, Дьааҥы, Бүлүү, Эдьигээн, Мэҥэ Хаҥалас, Өлүөхүмэ, Таатта улуустарыгар турбут ойуур баһаарын бохсор үлэ ыытыллар.
Бу үлэҕэ барыта 789 киһи, ол иһигэр 151 ойууру сиринэн харыстыыр сулууспа үлэһитэ, 334 парашютист уонна десантник-баһаарынньык, 12 лесничество, 14 Ыксаллаах быһыы-майгы министиэристибэтин үлэһитэ, 277 олохтоох нэһилиэнньэттэн мобилизацияламмыт киһи итиэннэ 46 араас тиэхиньикэ тардыллыбыт.
Биһиги бу сарсыарда быһа сибээскэ тахсыбыппытыгар Эдьигээннээҕи лестничество лесничэйин солбуйааччы Вячеслав Бродников маннык кэпсээтэ:
—Эдьигээн улууһугар, Баахынай нэһилиэгин сиригэр-уотугар 84 тыһ. гектардаах ойуурга уот барар, биһиги билигин бу баһаар нэһилиэнньэлээх пууҥҥа суоһаабатын туһугар киирсэ сылдьабыт. Уот салгыы тарҕамматын диэн Баахынайтан Таалын диэн үрэххэ диэри утары отжиг оҥордубут, ол эбэтэр утары уот ыыттыбыт. Уот өрө тахсан, хоту диэки салаллан, Таалын төрдүгэр тиийдэҕинэ, охсуута уон оччонон күүһүрүөҕэ. Тоҕо диэтэххэ, тыал наар хотуттан үрэр буолан, Баахынай бөһүөлэгэр уот аны ол диэкиттэн суоһуур кутталлаах. Инньэ диэн сүбэлэһэн, уопсай мунньаҕынан быһаарыы ылынаммыт, утары уот ыытан бохсуу оҥордубут. Аны билигин уот арҕаа уонна соҕуруу өттүттэн кэлэн иһэр, онно эмиэ бохсор дьаһаллар ылылла сылдьаллар. Тыа быыһынан улахан арыттар оҥоһулуннулар, минерализованнай балаһалар да бааллар, онон бу күннэргэ саамай эппиэттээх, быһаарыылаах киирсиилэр буолуохтара. Бүгүн соҕуруу өттүттэн иһэр уоту утары уот ыытыахпыт. Олохтоохтору уонна уонна улуус кииниттэн кэлбит дьону кытары холбоон, барыта 60 киһи буолан үлэлии сылдьабыт. Сорохторбут, ЫБММ-нар бөртөлүөппүт көтөр эҥин диэн, бардылар, инньэ гынан бэйэбит эрэ хааллыбыт. Үлэ ыарахан. Илдьэ сылдьар тыраахтардарбыт, икки “ДТ” уонна биир “Бөлөрүүс” ноҕуруускаларын тулуйбакка, алдьанан хааллылар, хата, кыл-мүччү минерализованнай балаһаларбытын оҥордубут. Олохтоохтортон уоту умуруорарга мобилизацияламмыт уолаттар бэйэлэрин матассыыкылларынан, массыыналарынан сылдьаллар. Мин подрокопербын көтүтэн, баһаары онон көрөбүт-истэбит. Дьэ итинник үлэлии-хамсыы сылдьабыт.
Баай хара тыабытын кытарартан быыһыы сылдьар хоһуун дьоммутугар ситиһиилэри баҕарыаҕыҥ!
Раиса Сибирякова, «Саха сирэ» хаһыат, edersaas.ru