Алтынньы 8 күнүгэр Егор Борисов “Тыа сирин нэһилиэнньэтэ экономическай уонна быраап өттүнэн билиилээх буолуута” диэн куурус истээччилэрин кытта көрүстэ. Көрсүһүү биир сыллааҕыта Ил Дархан ыйааҕынан Салайыы институтун базатыгар тэриллибит Инновационнай менеджмент үрдүкү оскуолатыгар (ВШИМ) буолла. edersaas.ru
“О кадровой политике в сельском хозяйстве Республики Саха (Якутия)” диэн 2017 сыл бэс ыйын 14 күнүнээҕи Ил Дархан таһаарбыт 1965 №-дээх ыйааҕынан ВШИМ базатыгар тыа сирин нэһилиэнньэтин экономическай уонна быраап өттүнэн билиилээх буолалларыгар лектордары бэлэмнииллэр. Ол курдук, ахсынньыга 70 лектор ВШИМ куурустарын бүтэриэхтээх, кинилэри кытта Ил Дархан сирэй көрүстэ. Үөрэх кыһатын ректора Сардана Татаринова этэринэн, биир сыл иһигэр үөрэх хаамыыта уларыйан, преподавателлэр састааптара күүһүрэн биэрбит эбит. 155 преподавателтэн хас бэһис киһитэ Москва, Санкт-Петербург уонна Арассыыйа атын куораттарын тарбахха баттанар исписэлиистэрэ буолаллар. Бу күн тута аныгы технологиялардаах бырайыагы салайар хамаанда тэрилиннэ.
Кууруһу ааспыт дьон тыа сирин олохтоохторугар судаарыстыбаннай уонна олохтоох салалта өҥөлөрүн, социальнай көмөнү, сир учаастагын, территорияны тупсарыныы туһунан кэпсиэхтэрэ, иһитиннэриэхтэрэ. Уопсайа барыта 100 лектор бэлэмнэнии кууруһу ааһыаҕа.
Лектордары кытта көрсүһүүгэ Ил Дархан Егор Борисов: “Олох уларыйан истэҕин ахсын хайа баҕар эйгэ исписэлииһигэр саҥа сыаллар, соруктар тураллар, ону кытта кини таһымын үрдэтэн, билиитин кэҥэтэн иһиэхтээх. Бу куурустарга сылдьыбыт киһи ханнык баҕарар киһи интэриэһиргиир боппуруостарыгар сөптөөх эппиэти биэрэр билиилээх буолуохтаах. Тыа сирин олохтоохторугар оҥорон таһаарыы табаарын дьаһайыы, тыа хаһаайыстыбатын бородууксуйаларын оҥоруу санаатын күүскэ иҥэриэхтээххит”, — диэн эттэ.
Дьон үөрэниэн, сайдыан баҕарар, бу кыах тыа сирин дьонугар барытыгар бэриллибэт. Эһиги билиини эрэ буолбакка, кинилэр ону олохторугар сөпкө тутталларын ситиһиэхтээххит диэн Ил Дархан лектордары кытта көрсүһүүнү түмүктээтэ. edersaas.ru
Мария Васильева хаартыскаҕа түһэриилэрэ.