Маны аах Уопсастыба

«Восток» ыччат форума саҕаланна

От ыйын 12 күнүттэн «Восток» диэн ыччат Арассыыйатааҕы форумун онлайн-түһүмэҕэ саҕаланна. Владивостокка Уһук Илиҥҥи федеральнай университекка дойду 300 бастыҥ ыччата сонун санааларын үллэстэ, бырайыактарын билиһиннэрэ муһунна.  

Бу форум сүрүн сыалынан Уһук Илин эрэгийиэнигэр ыччаты угуйуу, социальнай-профессиональнай кыахтарын арыйыы, көҕүлээһиннэрин өйөөһүн буолар. «Восток» кыттааччыларын Приморскай кыраай губернатора Олег Кожемяко, ыччат дьыаларыгар федеральнай ааҕыныстыба салайааччытын солбуйааччы Андрей Платонов, Уһук Илиҥҥи уонна Арктиканы сайыннарыы корпорациятын дириэктэрэ Гасан Гасанбалаев, Уһук Илиҥҥи федеральнай университет ректорын эбээһинэһин солбуйааччы Алексей Кошель, РФ Уопсастыбаннай палаататын эдэр исписэлиистэр тэриллиилэрин сайыннарыыга сэбиэтин бэрэссэдэтээлэ, МАКО бэрэсидьиэнэ Ольга Голышенкова көрүстүлэр.

Форумҥа кыттыан баҕалаахтартан 800 сайаапка киирбит. Онтон Арассыыйа 51 эрэгийиэниттэн 18-35 саастаах 300 бастыҥнара бу былаһааккаҕа муһунна. Кинилэри араас тиэмэҕэ лиэксийэлэр, кэпсэтиилэр, үөрэхтэр күүтэллэр. Форум чэрчитинэн Росмолодежь граныгар куонкурус ыытыллыаҕа. Ыччат араас хайысханан 1,7 мөлүйүөн суумаҕа тиийэ бырайыагар өйөбүл ылыан сөп.

0
0