Алтынньы 11 күнүгэр Благовещенскай куорат авиапордугар “Руслан” диэн саамай улахан сөмөлүөт “Метеор-М” космическэй аппараты аҕалбыта. Ити күн сүрүн космическай таһаҕаһы “Восточнай” космодромҥа тиэрдибиттэрэ.
“Метеор – М” аппараты 2017 сыл сэтинньи 28 күнүгэр “Союз-2.1б” аракыата космоска таһаарыаҕа. Ол аата “Восточнайтан” иккис сүрүн көтүү буолар. Бастакы анал спутнигы 2016 сыл муус устар 28 күнүгэр таһаарбыттара.
“Метеор –М” №2-1 спутник Сир гидрометеорологическэй туругун быһаарар аналлаах. Хаар уонна муус араҥаны араас диапозонтан устуоҕа. Спутник көмөтүнэн исписэлиистэр муора, акыйаан үрдүнээҕи температураларын, атмосфераҕа озон тарҕаныытын, о.д.а билиэхтэрэ-көрүөхтэрэ.
Иккис көтүүнү оҥорууга сүрүн оруолу ылар, ол эбэтэр аракыатаны түргэтитэр “Фрегат” блогу эмиэ космодромҥа аҕаллылар. Исписэлиистэр космическэй аппараттары таҥыыны саҕалаатылар. “Фрегат” блокка пневмовакуумнай бэрэбиэркэни ыыталлар.
Санатар буоллахха, “Канопус-В” диэн ыксаллаах быһыыны-майгыны бэрэбиэркэлиир (мониторинныыр) спутник быйыл ахсынньыга таһаарыллыаҕа, ол аата бу “Восточнай” космодростан үһүс аракыатаны көтүтүү буолар.
Алтынньы саҥата “Роскосмос” бэрэстэбиитэллэрэ анаан-минээн кэлэн, сэтинньигэ көтүөхтээх аракыата тобохторо түһүөхтээх Бүлүү уонна Алдан улуустарыгар сылдьан, тулалыыр эйгэттэн уу, буор боруобаларын ылбыттара.
Александр ТАРАСОВ, «Саха сирэ» хаһыат, edersaas.ru