Ковиды утары охсуһарга волонтерынан үлэлээбит устудьуоннар ординатураҕа киирэллэригэр эбии баал эбиллэрин туһунан РФ Доруобуйа харыстабылын министиэристибэтэ бэйэтин саайтыгар иһитиннэрдэ.
Бу туһунан уураахха РФ премьерэ Михаил Мишустин илии баттаата.
Коронавируһу сэрэтии уонна эмтээһин дьаһалларыгар баҕа өттүнэн үлэ кыттыылаахтара ординатураҕа киирэллэригэр тус ситиһиилэрин иһин 20 баал ааҕыллыаҕа. Ол эбэтэр эбии баалы волонтерунан 150 чаастан ордук кэмҥэ үлэлээбиттэр ылар кыахтаныахтара.
Онон бу үөрэх дьылыгар волонтердарга эбии баал Арассыыйа 227 университетыгар киирээччилэргэ оҥоһуллар. Онуоха ординатураҕа киирээччи докумуоннарын туттарыар диэри 3 ый иннинэ волонтердаабыт буолуохтаах. Ол эбэтэр тутар хамыыһыйа кулун тутарга диэри үлэлээбит кэмҥитин учуоттуур. Волонтерунан үлэлээбити дакаастыырга хамыыһыйаҕа волонтер киниискэтин туттарыллар. Волонтер тус киниискэтэ — үлэ киниискэтин кэриэтэ. Бу докумуоҥҥа волонтердаабыт ыстааһыҥ, куурустарга уонна куонкурустарга кыттыыҥ учуоттаналлар. Волонтер киниискэтэ кумааҕы уонна электроннай көрүҥнээх буолар.
Надежда ЕГОРОВА, «Саха сирэ», edersaas.ru
+1
+1
+1
+1
+1
+1
+1