Уопсастыба

Волонтердарга РФ Бэрэсидьиэнин наҕараадалара туттарылыннылар



Саха сирин волонтердарыгар наҕараадалары туттардылар. 

Өйдөбүнньүк мэтээллэри уонна «За бескорыстный вклад в организацию Общероссийской акции взаимопомощи #МыВместе» грамоталары СӨ Бырабыыталыстыбатын Бэрэссэдээтэлэ Андрей Тарасенко аахсыйа чэрчитинэн кыһалҕалаахтарга ис сүрэхтэриттэн турунан көмөлөспүт волонтердарга туттарда.
Наҕараадаламмыттар ортолоругар ОНФ (Общероссийский народный фронт) көхтөөх кыттааччылара, «Молодёжка ОНФ» хамаанда кыттыылаахтара, устудьуоннар, суруналыыстар, урбаанньыттар бааллар.
«Дойдулаахтаргытын кыһалҕалаах кэмнэригэр өйүүргүтүгэр уонна көмөлөһөргүтүгэр Өрөспүүбүлүкэ салалтатын уонна тус бэйэм ааппыттан бэлиэтээн туран махтанабын. Саха сиригэр үтүө сүрэхтээх, дьоҥҥо көмөлөһөргө бэлэм, сайаҕас дьон элбэхтэрэ пандемия кэмигэр дьиҥ көһүннэ. Өскөтүн бу курдук турунан күүстээхтик үлэлиир волонтердар хамсааһыннара суоҕа эбитэ буоллар, биһиэхэ хас эмэ бүк ыарахан буолуох этэ. Эһиэхэ махтал, кыһалҕаны көрөн туран туора туран биэрбэккитигэр, эргиччи үтүөнү оҥоро сылдьаргытыгар«, — диэтэ кини.
Дойдуга бэриниилээх буолуу сылыгар өрөспүүбүлүкэҕэ  хардарыта өйөбүл буолуу үтүө үгэһэ ураты үрдүк, улахан суолталанна. Пандемия саҕаланыаҕыттан өрөспүүбүлүкэҕэ түөрт тыһыынчаттан тахса киһи ис сүрэҕиттэн кыһалҕалаахтарга, кырдьаҕастарга, мэдиссиинэ эйгэтин үлэһиттэригэр көмөлөһөр баҕалаах кэлбиттэрэ.
СӨ ОНФ эрэгийиэннээҕи исполкомун салайар Валерий Лютай Саха Өрөспүүбүлүкэтин  уонна Арассыыйа салалталарыгар, Саха сирин бары олохтоохторугар өйөбүллэрин уонна эрэллэрин иһин махтанна.
Наҕараадаламмыттар испииһэктэрин манна көрүөххэ сөп.
СӨ Ил Дархан уонна Бырабыыталыстыба пресс-сулууспата
Мария Васильева (СИА) хаартыскаларга түһэриитэ
0
0

Санааҕын суруй