Волонтердарга махтаннылар

Бүтүн Арассыыйатааҕы #МыВместе аахсыйанан, аадырыһынан көмөнү оҥорорго быһа сибээс аһыллыбыта. Волонтердар киирбит сайаапканан аһы-үөлү, күннээҕи туттуллар малы-салы, эми-тому атыылаһан аадырыстарынан уталыппакка тиэрдэн улахан көмөнү оҥордулар.  Бэйэлэрин баҕаларынан көмөлөһөр мэдиссиинэ үөрэхтээх волонтердар мэдиссиинэ тэрилтэлэригэр, ол иһигэр «кыһыл зонаҕа» кытары үлэлээтилэр. Онлайн-волонтердар үөрэтэр, аралдьытар тэрээһиннэри, өй-санаа өттүнэн көмөнү, өйөбүлү соҕотох олорор кырдьаҕастарга куйаар ситиминэн, төлөпүөнүнэн кэпсэтэн көмөнү оҥордулар. Психолог-волонтердар наадыйар дьоҥҥо барыларыгар быһа сибээһинэн өйөбүл буоллулар.

Аахсыйаҕа хас күн ахсын ис дууһатыттан баҕаран туран кыттыһар киһи элбээн иһэр. Бүгүн волонтердар өрөспүүбүлүкэтээҕи ыстааптарыгар  2,5 тыһыынчаттан тахса киһи бэйэтин баҕа өттүнэн көмөлөһөр, үлэлиир. Кинилэр ортолоругар култуура эйгэтиттэн волонтердар эмиэ бааллар. Пандемия саҕаланыаҕыттан 26 тыһыынчаттан тахса киһиэхэ көмө оҥоһулунна.

Өрөспүүбүлүкэҕэ коронавирус дьаҥа туруоҕуттан волонтердар хамсааһыннарыгар ис сүрэхтэриттэн кыттыспыт, кыһалҕалаахха, кыаммакка көмөлөһөн сүүрбүт-көппүт, өйөбүл буолбут сырдык санаалаах волонтердары ахсаабат кыһамньыларын, көмөлөрүн сыаналаан, бүгүн ХИФУ М.К.Аммосов искибиэригэр түмэн, махтал тыл бастыҥын эттилэр, үтүөнү-кэрэни баҕардылар.

СӨ ыччат дьыалатыгар уонна социальнай коммуникацияларга миниистири бастакы солбуйааччы Александр Сусоев өрөспүүбүлүкэҕэ коронавирус дьаҥын тарҕаппат туһугар, аҕам саастаах дьоҥҥо сүрэхтэрин баҕатынан көмөлөспүт волонтердарга махтанна. Ыччаттары волонтердар хамсааһыннарыгар ыҥырда.

2020 сыл бэс ыйын 11 күнүгэр РФ Бэрэсидьиэнэ Владимир Путин дьаһалынан олохтоммут «За бескорыстный вклад в организацию Общероссийской акции взаимопомощи «#МЫ ВМЕСТЕ» өйдүү-саныы сылдьарга мэтээлинэн уонна грамотанан  «Волонтеры Победы» ЯРО ВОД актыбыыстара, Дьокуускай куорат 16 №-дээх оскуолатын үлэ уруогар учуутала Роберт Иванов, Молодежка Бүтүн Арассыыйатааҕы народнай фронт хамаандатын чилиэнэ Вероника Горюнова, «Волонтер-медиктэр» ЯРО көхтөөх кыттааччыта, ХИФУ 6 кууруһун устудьуона Ньургун Слюгров, «Волонтер-медиктэр» ЯРО «Популяризация кадрового донорства» хайысха эрэгийиэннээҕи координатора, ХИФУ мэдиссиинэҕэ институтун 4 кууруһун устудьуона Максим Дохунаев, ХИФУ мэдиссиинэҕэ институтун 2 кууруһун устудьуона Найаана Охлопкова, «Волонтерская помощь в медицинских организациях» эрэгийиэннээҕи координатора, ХИФУ мэдиссиинэҕэ институтун 3 кууруһун устудьуона Алена Николаева наҕараадаланнылар.

Ыччат дьыалатыгар федеральнай ааҕыныстыба махтал суруктара Ольга Эверстоваҕа, Айаал Афанасьевка (Нам улууһа), Григорий Коноваловка, Александра Дубровицкаяҕа (Жатай),  Анна Тимофееваҕа (Горнай улууһа), Евгения Сергееваҕа, Николай Иванчакка (Хаҥалас), Иван Бушковка, Галина Алексееваҕа (Чурапчы улууһа), ХИФУ мэдиссиинэҕэ институтун 6 кууруһун устудьуоннарыгар Ольга Буслаеваҕа, Влада Ярковаҕа, ХИФУ РФ Хотугулуу-Илиҥҥи норуоттар тылларын уонна култуураларын үөрэтэр институт 4 кууруһун устудьуонугар Любомира Николаеваҕа туттарылыннылар.

СӨ ыччат дьыалаларыгар уонна социальнай коммуникацияларга министиэристибэтин махтал суруктарынан Дьокуускай куорат 21 №-дээх оскуолатыгар иитэр үлэҕэ дириэктэри солбуйааччы Максим Гуринов, СӨ ОНФ ыччакка бырайыактарын координатора Дмитрий Паньков, Хатаска ыччат бэлиитикэтигэр уонна успуорка исписэлиис, аахсыйа волонтера Семен Игнатьев бэлиэтэннилэр.

Волонтердар кииннэрин Ассоциациятын үлэтигэр көхтөөх кыттыыларын иһин махтал суруктары Горнай улууһуттан «Улууспут туһугар» ыччат хамсааһына (бэрэссэдээтэл Дьулустаан Абрамов), эрэгийиэннээҕи координатор Ирина Тергюлева туттулар.

СӨ Ил Дархан уонна Бырабыыталыстыба пресс-сулууспата

Мария Васильева (СИА) хаартыскалара