Волонтердар уонна үтүө санаалаах ыччаттар номнуо хаһыс да сылын, Медицинэ национальнай киинигэр ыарыһах оҕолорго «Үөрүү-көтүү уруоктарын» ыытар үгэстээхтэр.
Фаина Филиппова кэпсииринэн, «Мегафон» хампаанньа иилээн-саҕалаан ыытар социальнай бырайыагар 2014 сыллаахха кыттыспыттар. Бу бырайыак ыарыһах оҕолор күннээҕи олохторун чэпчэтэр, ыарыыларын умуннарар сыалтан оҥоһуллубут. Дьокуускай куорат иннинэ, бу тэрээһиҥҥэ Хабаровскай, Южно-Сахалинскай, Владивосток уонна Чита куораттара кыттыспыттар.
Билигин Медицинэ национальнай киинин онкогематологическай салаатыгар онко-ыарыылаах оҕолор хас да ыйы быһа, сорохтор сылы-сыллаан сыталлар. Төрөөбүт дьиэлэриттэн, улуустарыттан тэйэн. Онон, балыыһаҕа сытан уһуннук эмтэнэр оҕолорго маннык тэрээһиннэр ордук туһалаахтарын Фаина Филиппова этэр. Ол курдук, волонтердар оҕолору кытары уруһуйдууллар, араас интэриэһинэй оҥоһуктары оҥороллор. Маны таһынан, бэйэлэрэ араас остуоруйалары туруоран көрдөрөллөр. Оҕолор маннык уруоктары өрүү кэтэһэллэр, күүтэллэр. Кыра да бириэмэҕэ ыарыыларын умналлар.
Билигин «Мегафон» ПАУо иһинэн үлэлиир «Үөрүү-көтүү уруоктара» Саха сиригэр, Забайкальскай, Хабаровскай кыраайдарга уонна Амурскай уобаласка тиһигин быспакка ыытыллаллар.
Анивера Акимова, edersaas.ru