Волонтердар — пандемияны утары үлэҕэ көмөлөһөр сүрүн күүстэр

Бөлөххө киир:

Волонтердар өрөспүүбүлүкээтээҕи куорпустара дойдуга пандемия саҕаланыаҕыттан, 2020 сыл кулун тутар 20 күнүттэн, үлэлиир.

edersaas.ru

Волонтердар өрөспүүбүлүкэтээҕи куорпустарын улуустары кытары үлэҕэ салайааччы Алгыс Прокопьевич Петров үлэ-хамнас хайдах салаллан иһэрин маннык кэпсээтэ:

«Улуустардааҕы волонтердар куорпустарын салайааччылар улахан аҥаардара -– ыччаты кытары үлэлиир исписэлиистэр. Уопуттаах салайааччылардаах волонтердарбыт куорпустара дойдуга пандемия хара саҕаланыаҕыттан тохтообокко үлэлээн кэллилэр. Кинилэр хас күн аайы нэһилиэнньэттэн киирэр сайаапкалары ылан, тута хаачыстыбалаахтык толороллор.


Өрөспүүбүлүкэ үрдүнэн билиҥҥитэ 400-тэн тахса сайаапка оҥоһуллар. Сүрүннээн кырдьаҕас дьон ас-үөл, эмп-том сакаастыыллар. Волонтердар билигин өссө оройуоннааҕы балыыһаларга көмөлөһөн эрэллэр. Ону сэргэ колл-кииннэргэ, тэрилтэлэргэ уо.д.а. араас өҥөнү хааччыйаллар.
2020 сылтан үлэлээн, уопсайа 50 тыһыынчаттан тахса сайаапка толорулунна. Сайаапкалар биһиэхэ быһа 88002003411 нүөмэринэн киирэллэр, ону толоробут.
Волонтердары үлэҕэ ыллахпытына, бастатан туран, хайаан да үөрэтэбит, тустаах быраабылалары ирдиибит, сүбэ-ама биэрэбит. Пандемия аан бастаан саҕаланарыгар «ыарыыны волонтердар тарҕаталлар» диэн оруна суох сурахтар тарҕана сылдьыбыттарын билэҕит. Оннук буолбатах. Биһиги волонтердарбыт туруктарын кэтээн көрөбүт, ыарыы сибикитэ баарын биллилэр да, анаалыс туттаран, изоляцияҕа бараллар. Нэдиэлэ аайы тустаах анаалыстары туттаран эрэ баран, үлэҕэ ылсаллар«.

Ити курдук, волонтердар өрөспүүбүлүкэтээҕи ыстааптарыгар 1781 волонтер (ол иһигэр 742 — Дьокуускайга) баҕа өттүнэн көмөлөһө, ыарыыны утары үлэҕэ бэйэтин кылаатын киллэрсэ сылдьар.

Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0