Сүрүн Уопсастыба

Волонтердар кииннэрэ үлэлиир

Хамсык кэмигэр Саха сиригэр Волонтердар кииннэрэ таһаарыылаахтык үлэлээтэ. 

Арассыыйаҕа 2,7 мөл. кэриҥэ киһи  волонтердар хамсааһыннарыгар кыттар. “Үгүстэр бу эйгэҕэ оскуолаҕа сылдьан үлэлэрин саҕалыыллар. Уонна бу уопсастыбаҕа үтүө бэлиэ”, — диэбитэ “Биир ньыгыл Арассыыйа” генсэбиэтин сэкирэтээрэ Андрей Турчак.

Василий Попов, “Биир ньыгыл Арассыыйа” баартыйа волонтердар эрэгийиэннээҕи кииннэрин салайааччыта:

— Баартыйа эрэгийиэннээҕи волонтердарын киинэ 2020 сыл кулун тутарга үлэтин саҕалаан, хас да үөрэх тэрилтэтин устудьуоннара киирбиттэрэ. Оҕолор дьиэттэн тахсыбакка олорор дьоҥҥо эми-тому, бородууктаны аҕалбыттара, эмчиттэргэ бородуукта нобуордарын уонна итии аһылыгы таспыттара. Билигин кинилэртэн үгүстэрэ тэйиччиттэн үөрэниигэ көһөн, дьиэлэригэр тарҕаспыттара. Ол эрээри олорор дэриэбинэлэригэр даҕаны уопсай кыһалҕаттан туора турбатылар, муус ыллылар, хаһаайыстыбаҕа көмөлөстүлэр.

Анна Харайданова (Томпо оройуонун Хаандыга бөһүөлэгэ), “Ласточки” эмчит-волонтердар хамсааһыннарын салайааччыта, баартыйалаах. “РФ бэрэсидьиэнэ Владимир Путин олохтообут “Бары бииргэбит” мэтээлинэн наҕараадаламмыта.  Волонтер үлэтин саҕалыырыгар кини учаастактааҕы медсиэстэрэнэн үлэлээбитэ.

Биһиги сүрүн сорукпут – көмөлөһүү. Бородуукта, эмп атыылаһабыт, кырдьаҕастарга, инбэлииттэргэ психологическай көмөнү эмиэ оҥоробут”, — диир кини.

Виктория Пинигина (Дьокуускай)  РФ  Хотугулуу-илиҥҥи норуоттарын тылларын уонна култуураларын институтун устудьуона. Бу сыл тохсунньутугар кини “Волонтердар үлэлэрэ” номинацияҕа бастыҥынан ааттаммыта. Кини бу үлэтин өссө “Дьулуур” оҕо хамсааһыныгар сылдьан саҕалаабыта. 2019 сылтан Биир ньыгыл Арассыыйа Эдэр гвардиятын уонна Волонтердар кииннэрин актыбыыһынан буолбута.

Коронавирус иккис долгуна саҕаламмытыгар ийэм долгуйан миигин дьиэҕэ олордубута. Ол эрээри мин таах олоруохпун баҕарбатаҕым. Ийэбин кытта кэпсэтэн, өйдөһөн, кини миигин өйөөбүтэ. Онон аҕыйах хонугунан иккиэн волонтердуу кэлбиппит. Билигин кини массыынатынан бородууктаны уонна волонтердары таһар, оттон мин кинилэр үлэлэрин сүрүннүүбүн”, — диэн кэпсээтэ.

Бэлэмнээтэ Женни Стрюкова

 

0
0

Добавить комментарий