Волонтердар үлэлэрэ кэҥэтилиннэ. #МЫ ВМЕСТЕ бырайыак иитинэн мэдиссиинэ тэрилтэлэригэр уонна нэһилиэнньэҕэ көмөлөһөр өрөспүүбүлүкэтээҕи волонтердар куорпустара тастан эмтэнээччилэргэ, доруобуйаларыгар хааччахтаах уонна 60 үөһэ саастаах дьоҥҥо эмтэрин-томторун тиэрдэн биэрии үлэтин күүһүрдэр.
Маннык быһаарыы СӨ Бырабыыталыстыбатын бэрэссэдээтэлин солбуйааччы Ольга Балабкинаҕа буолбут сүбэ мунньахха ылыллыбытын туһунан этиллэр. «Пандемия саҕаланыаҕыттан соҕотох олорор кырдьаҕастарга, доруобуйаларыгар хааччахтаах дьоҥҥо, дьиэттэн тахсыбакка хааччахтанан олорооччуларга волонтердар, #МыВместе партнердарбыт көмөлөһөллөр. Эпидемиологическай быһыы-майгы уустугурбутунан, аадырыстарынан көмөҕө наадыйааччы элбээтэ«, — диир Ольга Балабкина. Өрөспүүбүлүкэтээҕи волонтердар куорпустарын, СӨ ОНФ эрэгийиэннээҕи исполкомун, «Биир ньыгыл Арассыыйа» баартыйа эрэгийиэннээҕи салаатын бэрэстэбиитэллэрэ үлэни күүһүрдэргэ этиилэри киллэрбиттэр.
Волонтердар мэдиссиинэ тэрилтэлэрин колл-кииннэригэр, волонтер-учууталлар үөрэххэ эбии дьарыкка, аниматордар хааччахтааһын кэмигэр иллэҥэ суох үлэлиир мэдиссиинэ үлэһиттэрин, быраабы араҥаччылааччылар оҕолоругар сынньалаҥы туһалаахтык атаарыыга көмөлөһүөхтэрэ. СӨ социальнай-психологическай киинин кытары дьоҥҥо-сэргэҕэ коронавирус кэнниттэн чөлгө түһүүгэ, хааччахтанан олоруу кэмигэр уйулҕаны бөҕөргөтүүгэ иһитиннэрэр-биллэрэр үлэлэр күүһүрүөхтэрэ.
Санатан эттэххэ, #МыВместе хардарыта көмөлөһүү Арассыыйатааҕы аахсыйа коронавирус дьаҥын кэмигэр дойдуну түмпүт ураты санаанан буолар. Аахсыйа РФ 85 эрэгийиэнигэр 2020 сыл кулун тутар 16 күнүттэн саҕаламмыта. Бырайыак чэрчитинэн волонтердар аҕам саастаахтарга уонна доруобуйаларынан хааччахтаах дьоҥҥо, ону сэргэ мэдиссинэ үлэһиттэригэр, о.д.а. көмөҕө, өйөбүлгэ наадыйааччыларга көмөлөһөллөр.
СӨ Ил Дархан уонна Бырабыыталыстыба пресс-сулууспата
+1
+1
+1
+1
+1
+1
+1