Үөһээ Бүлүүгэ Олоҥхо Ыһыаҕар 75 волонтер олус бэркэ үлэлээтилэр. Кинилэр ыалдьыттарга ыйан-кэрдэн, сирдээн биэрэн, араас буклеты, бырагырааманы, сувенирдары, ууну, быырпаҕы тарҕатан, бөҕү хомуйан, улаханнык көмөлөстүлэр.
Холобур, ыһыах сабыллыыта бүтээтин кытары, бары саба түһэн, олбохтору хомуйан киирэн бардылар.
Волонтердар салайааччылара Михаил Спиридонов этэринэн, ыһыахха кэлбит ыалдьыттар култууралара үрдүк, »дорообо-дыраастый», »махтал-баһыыба» диэн тылларын тута сылдьаллар диир. Үөһээ Бүлүүгэ »Сомоҕо» диэн волонтердар түмсүүлэрэ баар, пандемия кэмигэр дьоҥҥо көмөлөһөн, үтүө дьыала оҥорон, үлэлээбиттэрэ. Ыһыахха 10-11 кылаас оҕолорун, устудьуоннары, ыччаты ыҥырбыттар. Добро.ру саайтка бэлиэтэнэн эрэ баран, волонтер буолбуттар.
Волонтердар ыраахтан ала-чуо көстөр, чаҕылхай өҥнөөх анал формалаахтар, олус эйэҕэстэр, сүүрэ-көтө сылдьаллар.
— Биһиги улууспут сайдарыгар бэйэбит кылааппытын киллэрэ сылдьарбытыттан, үтүө дьыаланы оҥорон, дьоҥҥо көмөлөһөрбүтүттэн үөрэбит, — диир Михаил.
Ангелина Васильева, »Саха сирэ» хаһыат, edersaas.ru