Волонтердар 27 тыһыынча сайаапканы толордулар

Бөлөххө киир:

Волонтердар өрөспүүбүлүкэтээҕи куорпустара бу дьыл кулун тутарыттан саастаах уонна көмөҕө наадыйар дьонтон 27 тыһыынча сайаапканы тутта.

«Волонтер буолуон баҕалаах дьону үөрэтэбит, харыстанар малларынан хааччыйабыт. Кинилэр саастаах уонна көмөҕө наадыйар дьоҥҥо бородуукталары таһаллар. Ону таһынан биһиги психологическай көмөнү ыытабыт. Билигин психолог-волонтердарга нобуор буола турар«, — диэн киин дириэктэрэ Алена Кычкина этэр.

Билигин Саха сирин үрдүнэн 400 волонтер күннэтэ үлэлиир, өссө 400 киһи резервэҕэ баар. Саастаах дьонтон сайаапка күннэтэ киирэр. «Саамай элбэх сайаапка Горнайтан уонна Чурапчыттан киирэр. Манна волонтердар күҥҥэ 30-тан 60-ҥа тиийэ сайаапканы көрөллөр. Оттон Дьокуускайга суукка иһигэр уонча сайаапка киирэр», — диэн Кычкина эбэн этэр.

ХИФУ-га «Миэдик-волонтер оскуолата» диэн бырайыак олоххо киирэр. Манна Саха сирин олохтоохторо эрэ буолбакка, атын эрэгийиэннэр бэрэстэбиитэллэрэ эмиэ үөрэнэллэр. Ол курдук, Саха сириттэн, Ростовскай, Московскай, Ульяновскай уобаластартан, Ставропольскай кыраайтан, Калмыкияттан, Дагестантан, Адыгеяттан барыта 50 волонтер үөрэнэ сылдьар.

Маны сэргэ ахсынньы 5 күнүттэн «Волонтер каартата» диэн бырайыак үлэлиэҕэ. 150 чаастан элбэҕи үлэлээбит волонтердар араас маҕаһыннар, култуура кииннэрин чэпчэтиилэрин туһанар буолуохтара.

Якутия24 саайтан.

Хаартыска — СИА.

+1
0
+1
0
+1
0
+1
0
+1
0
+1
0
+1
0