Саха сирин спортивнай уопсастыбаннаһа #МыВместе диэн волонтердар хамсааһыннарыгар кыттыһар.
Спортсменнар, тириэньэрдэр уонна биэдэмистибэлэр салалталара, үлэһиттэрэ спорт бэтэрээннэригэр, саастаах дьоҥҥо, соҕотох биэнсийэлээхтэргэ бородуукта таһаллар. Куттал суоһаабатын туһуттан бэрчээккэлээх, мааскалаах сылдьаллар, астаах бакыаттары кыбартыыраҕа киирбэккэ, аанын таһыгар уураллар.
Спортивнай волонтерскай хамсааһыны СӨ сүүмэрдэммит хамаандаларын бэлэмниир киин дириэктэрин бастакы солбуйааччы Михаил Пахомов салайар.
Бүгүн, муус устар 22 күнүгэр, аахсыйаны тустууктар саҕалаатылар. Кинилэр истэригэр Саха сирин көҥүл тустууга сүүмэрдэммит хамаандатын сүрүн тириэньэрэ Александр Оконешников, хамаанда хапытаана, норуоттар икки ардыларынааҕы кылаастаах спорт маастара Виктор Рассадин, норуоттар икки ардыларынааҕы кылаастаах спорт маастара Михаил Иванов, Арассыыйа спордун маастара Дьулустаан Булатов уонна СӨ сүүмэрдэммит хамаандаларын бэлэмниир киин үлэһитэ Эдуард Старостин бааллар.
https://www.instagram.com/p/B_RDM-FIhc7/?igshid=7q2x69kwou9e
СӨ физическэй култуураҕа уонна спорка миниистирэ Иннокентий Григорьев баҕалаахтары хамсааһыҥҥа кыттыһарга ыҥырар: «Маннык уустук кэмҥэ туора турбаппыт. Спортсменнар холобурдарынан кэлиэгэлэрбит кыттыһахтара диэн эрэнэбит».
СӨ физическэй култуураҕа уонна спорка пресс-сулууспата.