Быйыл халаан уута ааһар кэмигэр, Дьокуускайга «Водоканал» ууну ыраастыыр саҥа тэрили туруоран, ону аан бастаан тургутан көрүө. Тэрилтэ салалтата кыраантан аны ыраас уу кэлиэ, урукку курдук уубут киртийиэ суоҕа диэн бүгүҥҥү пресс-конференцияҕа иһитиннэрдэ.
Ол эрэн, итии ууну арааран баран холбоотохторуна, билигин даҕаны хап-хара кирдээх уу кэлэр. Ону магистральнай уонна кыбартаал турбата эргэрэн, онно сылы сыллаан мустубут кир-хох, кумах, дьэбин итии ууну эмискэ биэрдэхтэринэ, суураллан кэлэр диэн быһаараллар.
«Водоканал» генеральнай дириэктэрэ Анатолий Кырджагасов: «Роспотребнадзор» ирдэбилигэр толору эппиэттиир ыраас, дьэҥкир уу хас биирдии дьиэҕэ тиийэрин туһугар, турба ситимин сууйуохха, эбэтэр саҥардыахха наада. Итии ууну «Теплоэнергия» хампаанньа биэрэр. Кинилэр ситимнэрин эмиэ көрүнэллэрэ наада. Уопсайынан, салайар хампаанньалар, итии ууну тиэрдээччилэр, олохтоох бэйэни салайыныы уоргана бары күүстэрин түмэн үлэлэстэхтэринэ биирдэ хас биирдии дьиэҕэ ыраас уу тиийиэ. «Водоканал» магистральнай ситим 30%-нын пластик турбаҕа уларыппыта, бу хайысханан үлэ салгыы барыахтаах», — диэн быһаарда.
Кэлэр өттүгэр «Водоканал» өрөспүүбүлүкэ 60% ыраас уунан хааччыйыа. Бастатан туран, Бүлүү бөлөх улуустарыгар ыраас ууну тиэрдэргэ күүстээх үлэ барыа. «2028-2032 сылга диэри тэрилтэ сайдыытын стратегиятын торумнаатыбыт. Ол чэрчитинэн, Бүлүү өрүс сүнньүнэн КОС (кирдээх ууну ыраастыыр тэриллэр) тутуллуохтара. Сир аннынааҕы уонна өрүс уутун ыраастыыр тэрили туруоран, олохтоох дьону үөрэтэн, кинилэри онно сыһыарыахпыт. «Водоканал» улуустардааҕы салааларын сэбиэскэй былаас эстибитин кэннэ ОДЬКХ тэрилтэтигэр биэрбиттэрэ, ол иһин бас билии өттүгэр кэккэ боппуруостар бааллар. Онон кинилэри кытта бииргэ үлэлэһиэхпит», — диэтэ Анатолий Кырджагасов.
Марианна ТЫРТЫКОВА, «Саха сирэ»хаһыат, edersaas.ru