Ил Дархан Айсен Николаев “Водоканал” АУо генеральнай дириэктэрин Анатолий Кырджагасовы кытары көрсүһүүтүгэр хампаанньа инвестиционнай бырайыактарга күүскэ үлэлэһэригэр эттэ. Ол иһигэр кирдээх ууну ыытар ситими саҥардыыга, ууну ыраастааһыҥҥа, о.д.а. бырайыактары ылан, эбийиэктэр тутууларын хонтуруоллууругар эттэ.
Көрсүһүү кэмигэр хампаанньа генеральнай дириэктэрэ билигин үлэни барытын биир ситимҥэ киллэрии бара турарын иһитиннэрдэ. Санатан эттэххэ, билигин коммунальнай хаһаайыстыба боппуруостарынан хас да тэрилтэ дьарыктанар, инвестиционнай бырайыактарга эмиэ тус-туһунан үлэлииллэр.
– Биһиги билигин сүрүн сыалбыт-сорукпут диэн бу үлэлэри барытын биир ситимҥэ киллэрии буолар. Ол эбэтэр бырайыак техническэй сорудаҕыттан саҕалаан тутуулары олоххо киллэриигэ тиийэ биир ситимнээх үлэ барыахтаах, – диэн иһитиннэрэр кэпсэтии кэмигэр Анатолий Андреевич.
Кини бэлиэтииринэн, маннык үлэ-хамнас баран, билигин Намҥа уонна Мэҥэ Хаҥаласка уу ситимини тардыыга бырайыактар докумуоннара номнуо оҥоһуллан бүтэн эрэллэр, салгыы бу бырайыактары “Водоканал” бэйэтэ олоххо киллэриэҕэ.
Хампаанньа биир улахан бырайыагынан Жатайдааҕы ууну ыраастыыр эбийиэк буолар. Бу бырайыак улахан аҥаара Олох-дьаһах, коммунальнай хаһаайыстыбаны саҥардыы фондатыттан үбүлэнэр. Маны таһынан “Водоканал” өрөспүүбүлүкэтээҕи бырагырааманан Үөһээ Бүлүүгэ ууну ыраастыыр станцияны киллэрэн, билигин кирдээх ууну ыытар ситими оҥоро сылдьар.
Аграфена КУЗЬМИНА